Camchuairt Ye Vagabonds + Cormac Begley agus imeachtaí eile

Tonn-Fuaime // Ionad an Bhlascaoid, Dún Chaoin, 11-25 Meán Fómhair 2020

Inniu an chéad lá de thaispeántas ealaíne atá le feiscint in Ionad an Bhlascaoid, i nDún Chaoin. Grúpa d’ealaíontóirí na háite atá páirteach, sin iad Deirdre McKenna agus a deirfiúr Ciara; mar aon le hÁine Ní Chíobháin; a hathair Tomáisín; agus Honora O’Neill. Tá íomhánna feicthe agam den taispeántas ar líne cheana féin, agus tá cuma bhreá ar na pictiúir. 

Tonn-Fuaime atá mar theideal air, agus beidh deis agaibh freastal ar an taispeántas, as seo go dtí an 25 Meán Fómhair. Beidh an tIonad ar oscailt déanach ar an Oíche Chultúir, má tá fonn spaisteoireachta oraibh in onóir na hócáide sin. Beidh tuilleadh eolais ar an leathanach seo faoi imeachtaí na oíche speisialta sin, an tseachtain seo chugainn!

Seimineár gréasáin ar Ghearrscéalta Uí Chadhain, Dé hAoine 18 Meán Fómhair 

Tá Seimineár Idirnáisiúnta eagraithe ag Cló Iar-Chonnacht, i bpáirt le hOllscoil na hÉireann, Gaillimh chun iniúchadh úr agus athléamh a dhéanamh ar ghearrscéalta Mháirtín Uí Chadhain. Beidh saineolaithe éagsúla ó cheithre thír éagsúla ag léiriú a gcuid suime agus eolais faoi ghearrfhicsean an scríbhneora ag an ócáid seo, a bheidh ag tarlú ar líne. Is i rith an lae, on 10:00-16:00 a bheidh sé ar bun agus is féidir le 100 duine freastal air, ach clárú roimh ré, ag an nasc áirithe seo.

Rónán Ó Snodaigh // Connolly’s, An Léim, Corcaigh, Dé Sathairn 12 Meán Fómhair @ 19.30

Is deas a bheith in ann a bheith ag trácht arís ar cheolchoirmeacha agus imeachtaí beo. Tá gan dabht, rialacha agus srianta nach bhfacthas cheana i bhfeidhm lena leithéid, ach léiríonn sé gur féidir fós leanúint ar aghaidh ag soláthar siamsaíochta.

Is faoi Rónán Ó Snodaigh a bheidh an cúram sin tráthnóna amárach agus é ag seinnt in Connolly’s, i gCorcaigh, ionad mór ceoil. Lean Rónán ar na meáin shóisialta chun eolas a fháil faoi na dátaí eile a bheidh sé le feiscint agus é ar an mbóthar. 

Ócáid fhilíochta le Ó Bhéal, ar líne, Dé Luain 14 Meán Fómhair @ 20:30

Bhí deis agam le déanaí an file Julie Walsh-Banwait a chur faoi agallamh don gclár Tús Áite, ar RTÉ Raidió na Gaeltachta agus í ag trácht ar a saothar ‘Dánta Póca’. Is as Conamara do Julie, ach tá sí ag cur fúithi san Astráil le blianta. Is í atá ar dhuine de bheirt fhilí a bheidh páirteach in ócáid atá eagraithe ag ‘Ó Bhéal’, dream a chuireann ócáidí filíochta agus litríochta ar siúl ar bhonn rialta i gCorcaigh den chuid is mó (nó ar líne).

Nuala Ní Dhomhnaill an file eile a bheidh le clos ag an ócáid fhíorúil seo, an séú huair dá leithéid a bheith eagraithe. Is i gcomhar le Foras na Gaeilge atá an imeacht dhátheangach seo agus is féidir leatsa a bheith ina dteannta beirt, ach clárú. Seol ríomhphost chuig info@obheal.ie nó caith súil ar leathanach Facebook na heagraíochta ar an oíche le bheith ag faire. 

Camchuairt an bhanna Ye Vagabonds le Cormac Begley, 17-26 Meán Fómhair 2020

Tá sraith coirmeacha beartaithe ag an mbanna Ye Vagabonds, in éineacht leis an gceoltóir Duibhneach, Cormac Begley. Is sraith de chuid Music Network atá i gceist leis na deartháireacha Mhic Ghloinn agus fear Bhaile na bPoc.

Timpeall na tíre ar fad a bheidh a dtriail: tosóidh siad ar an 17 Meán Fomhair i nDún Laoghaire na hardchathrach sula dtabharfaidh siad aghaidh ar Shligeach, Corcaigh, An Clár, Co. Laoise, an Ghaillimh agus Dún na nGall. Is féidir gach eolas a fháil faoi dhátaí srl, ach cuairt a thabhairt armusicnetwork.ie

An tseachtain seo áfach, seo na dátaí agus sonraí a bheidh ag teastáil uaibh, más áil libh iad a fheiscint: 

Déardaoin 17 Meán Fómhair, An Pavilion i nDún Laoghaire;

Dé hAoine 18 Meán Fómhair, Hawk’s Well, i Sligeach.