Gaelré úr
Albam #2 ag Gráinne Holland

Anocht sa Chultúrlann, ina cathair dhúchais Béal Feirste, a sheolfaidh Gráinne Holland a halbam is déanaí Gaelré.

Ag labhairt di le NÓS, dúirt Gráinne gur ábhar lúcháire é a dara halbam a sheoladh ar lipéad Gael Linn, agus laethanta a hóige caite aici ag éisteacht lena laochra ceoil a eisíodh ar an lipéad céanna.

“Tá gliondar orm a bheith luaite le Gael Linn. Níl sé furasta tú féin a chur chun cinn i saol an cheoil agus do chroí agus d’anam a chur os comhair an phobail. Ach is cinnte gur spreagadh mór é tacaíocht mar seo a fháil ó lipéad mór mar seo,” ar sí.

“Nuair a bhí mo chairde ag éisteacht le popcheol bhí mé féin ag gabháil le heisiúintí móra le Tríona Ní Dhomhnaill, Máiréad Ní Mhaonaigh agus Albert Fry, a thaifead ar lipéad Gael Linn.

“Is uathu siúd a fuair mé inspioráid an chéad lá agus tá mé ag iarraidh leanúint ar an chosán céanna ag déanamh mo chuid féin den cheol.”

Is í deirfiúr Ghráinne, Sarah Holland, Ardmhéara Dheisceart Bhaile Átha Cliath, a dhéanfaidh an t-albam a sheoladh go hoifigiúil.

Ar ardán an oíche chéanna, beidh an fidléir Dónal O’Connor, a léirigh Gaelré agus Teanga na nGael, an chéad albam le Gráinne, chomh maith le ceoltóirí móra eile atá le cluinstin ar an albam, ina measc John McSherry, Eamon Murray, Breandán Mulholland agus Micky McCluskey.

Amhrán déag de cheolta, idir shean agus nua, atá ar an bhailiúchán ar fad.

Rogha Ghráinne d’amhráin thraidisiúnta a thug sí léi thar na blianta, ó bhéal amhránaithe a bhíonn ag canadh thart fá chathair Bhéal Feirste agus Dún na nGall, mar aon le roinnt amhrán ar tháinig sí orthu le linn a taighde féin.

Ina measc, tá sean-amhráin amhail ‘An Droighneáin Donn’, ‘Úna Ní Chonchubhair Bháin’ agus ‘Síos an Sliabh’ (thíos), leagan den amhrán clúiteach ‘Down the Moore’ le Robert Burns, aistrithe go Gaeilge ag an fhile cáiliúil Seán Bán Mac Grianna.

Tá iontais bheaga eile ann chomh maith mar atá ‘An Fear Foltliath’, amhrán ó pheann an amhránaithe Seán Ó Muireagáin as Béal Feirste, scríofa faoina chara Rónán Mac Aodha Bhuí agus ar chuir Dónal O’Connor an tséis leis.

Sa chlúdach ceirnín tá nótaí ar a bhfuil míniú deas agus eolas ar fáil faoi gach amhrán, rud a chuireann go mór leis an saothar.

“An rud is fearr faoi na hamhráin Ghaeilge ná ní le duine ar bith iad,” arsa Gráinne.

“Is linn ar fad iad agus is féidir le daoine a gcuid féin a dhéanamh dóibh. Sin an rud a dhéantar agus is galánta an rud é na leaganacha éagsúla a bheith ann.”

Is galánta an rud é chomh maith albam nua ardchaighdeáin bheith eisithe ag amhránaí seo Bhéal Feirste.


Seolfar ‘Gaelré’ sa Chultúrlann ag 8in anocht. Tá £10 ar thicéad. Beidh Gaelré á sheoladh ar an Aoine seo chugainn, 18 Meán Fómhair, sa Wood Quay Venue i mBaile Átha Cliath. Tuilleadh eolais anseo.