Gradam NÓS buaite ag Éabha Breathnach ag Scléip Ghael Linn

Is í Éabha Breathnach, atá sa gcúigiú bliain i Scoil Chuimsitheach Chiaráin ar an gCeathrú Rua i nGaeltacht na Gaillimhe, a thug léi Gradam NÓS don amhrán nuachumtha is fearr ag Scléip Ghael Linn aréir.

Scríobh Éabha, as an Sruthán ar an gCeathrú Rua, an t-amhrán nua ‘Ó Neamh go Talamh’. Bhuaigh Éabha, ar bronnadh gradaim uirthi i gcomórtas Scléip roimhe seo, an gradam don ‘Amhránaíocht Aonair le Féintionlacan’ aréir freisin don amhrán céanna. Ba í Ciara Nic an Fhailí ó Ghaelcholáiste Cheatharlach a tháinig sa dara háit sa gcomórtas sin.

Dúirt eagarthóir NÓS Maitiú Ó Coimín go raibh an-áthas air an gradam a bhronnadh ar Éabha agus gur “léir go bhfuil rud éigin speisialta ar siúl i Scoil Chuimsitheach Chiaráin” mar gheall ar an gcaighdeán ard ceoil atá sa scoil le tamall de bhlianta anuas.

“Tá mé féin i m’eagarthóir ar NÓS le beagán le cois trí bliana anois agus tá an gradam áirithe seo gaibhte siar chun na Ceathrún Rua trí huaire cheana – cé is moite den bhliain 2019 nuair ba ag Anlann Pasta as Cill Chainnigh a bhí an lá.

“Tá amhrán álainn cumtha ag Éabha agus é ráite go haoibhinn aici don chomórtas seo. Tá a háit tuillte go maith aici i measc na gceoltóirí óga iontacha eile a tháinig roimpi ar nós Róisín Seoighe, an banna Beogacht, agus Sonny Ní Chathasaigh,” a dúirt Maitiú.

Reáchtáladh comórtas Scléip Ghael Linn ar líne den chéad uair riamh i mbliana, mar gheall ar shrianta an víris chorónaigh, ach taifeadadh clár speisialta leis na moltóirí Doireann Ní Ghlacáin, Pádraig Ó Conghaile, agus Gráinne Bleasdale, ag fear an tí agus bean an tí Mícheál Ó Ciaraidh agus Niamh Ní Chróinín i nGaillimh an tseachtain seo caite.

Torthaí

Amhránaíocht Aonair le Féintionlacan (sóisear)
#1 Caoimhe Ní Cheallacháin, Scoil Chaitríona
#2 And Nic Ruairí, Gairmscoil Mhic Diarmada

Amhránaíocht Aonair le Féintionlacan (sinsear)
#1 Éabha Breathnach, Scoil Chuimsitheach Chiaráin
#2 Ciara Nic an Fhailí, Gaelcholáiste Cheatharlach

Amhránaíocht Aonair le tionlacan ó fhuaimrian taca (sóisear)
#1 Grace Ní Ghéaráin, Gaelcholáiste Cheatharlach
#2 Sarah Ní Ghallchóir, Gairmscoil Mhic Diarmada

Amhránaíocht Aonair le tionlacan ó fhuaimrian taca (sinsear)
#1 Stephanie Nic Giolla Phádraig, Coláiste Pobail Osraí
#2 Hannah Nic Pháidín, Pobalscoil Chloich Cheann Fhaola

Ceol Uirlise Aonair sa stíl Pop/Rac/Snagcheol (sóisear)
#1 Jude Hoireabard, Gaelcholáiste Chill Dara
#2 Eoin Ó Cadhain, Scoil Chuimsitheach Chiaráin

Ceol Uirlise Aonair sa stíl Pop/Rac/Snagcheol (sinsear)
#1 Pól Mac Giolla Easpaig, Coláiste Ailigh
#2 Michael Holden, Pobalscoil Chorca Dhuibhne

Pop/Racghrúpa le Féintionlacan (sóisear)
#1 Garáiste, Scoil Chaitríona
#2 Creid, Coláiste Ailigh

Pop/Racghrúpa le Féintionlacan (sinsear)
#1 Camo agus na Leaids, Meánscoil Gharman
#2 Seolta, Scoil Chuimsitheach Chiaráin

Gradam NÓS don amhrán nuachumtha is fearr
Éabha Breathnach, Scoil Chuimsitheach Chiaráin

Gradam Scléip don taispeántas is fearr ag Craobh Scléip Ghael Linn
Camo agus na Leaids, Meánscoil Gharman