Ollbhailiúchán leictreonach Planet Mu
Ceoltóirí éagsúla ar µ 20

Cad é seo, go díreach?

Tá ceirníní Planet Mu 20 bliain ar an bhfód.

Seo 50 rian de cheol leictreonach curtha le chéile thar thrí dhluthdhiosca ag úinéir an lipéid, Mike Paradinas.

Ceol nár eisíodh cheana ar fad atá le clos, idir rianta úra ó Ital Tek, Mr Mitch, Kuedo is Herva, agus seoid ó ársaí urrúnta mar Jega, Mark One, Venetian Snares agus Datach’i a bhí ina suí ar an tseilf.

Buníodh Planet Mu ar dtús mar fho-lipéad de cheirníní Virgin go speisialta chun ceol Mike Paradinas (μ-Ziq) a eisiúint.

Ghlac Paradinas féin seilbh ar an lipéad in 1998.

Tá cáil an mhisnigh ar Pharadinas as ceol na stíle footwork a chur ar ardán domhanda leis an mbailiúchán Bangers & Work Vol. 1 (2010), ach léiríonn µ 20 go raibh a mhéar riamh ar chuisle bhíogach an cheoil leictreonaigh thuathalaigh aige – bíodh IDM, breakcore, ceol dubchéime nó grime i gceist.

An bhfuil aon mhaith ann?

Tá rian na foirfeachta ar an ‘Slow Knife’ fuar, dorcha, atmaisféarach le Kuedo a chuireann tús le diosca #1.

Port damanta fíochmhar breakcore é ‘Meeting A Buddha’ le Venetian Snare a bhfuil iomaí cor agus casadh le clos ann thar thréimse ocht nóiméad.

Blaisfear ceol jungle na sean-ré faoi dhó i bhfoirm ‘Thunderclap (Dubplate Mix)’ (2009) le Remarc agus ‘Le Ol Skool’ (2011) le Machinedrum.

Tá ‘103’ (1997) le Jega ar nós ‘Stem’ Dj Shadow athshamhlaithe ag Richard D James.

Buillí móra hip hop i dtraidisiún Pete Rock comhnasctha le mílseacht shéiseach Boards Of Canada atá le clos ar ‘Cloud Sculpture’ (2002) le Dykehouse.

Is iontach cliste mar a ghearann Milanese suas an cur i láthair ó MC garage athnaithnid (Dizzy Rascal, measaim) ar ‘1 Up’ (2004) i dtreo is go bhfuil brí na bhfocal go hiomlán doiléir ach gan aon laghdú ar bhlas trodach an rap féin.

Bí ag súil, freisin, le rianta breátha dub-techno (Ital, Ekoplekz), footwork (DJ Trax, DJ Nate, Jlin & Fawkes), IDM (John Wizards, Mu-ziq), grime (Silk Road Assassins, Vex’d, Swindle), agus house/garage (Oriol, Falty DL athmheascaithe ag Zed Bias, The Gasman).

Laigí?

Is agat a bheadh an fhoighne dá n-éireodh leat suí tríd iarrachtaí Hellfish, Ed Lawes, Hrvatski, agus Leafcutter John níos mó ná uair amháin.

Cé nach bhfuil aon chúis dhíomá ró-mhór ann don éisteoir guasach caithfear a rá go bhfuil μ 20 beagáinín ar fud na háite ó thaobh stíle agus caighdeáin de.

Is trua nár iarr Paradinas ar dhioscmharcach samhlúil éigin mar DJ Food a rogha rianta as iar-chatalóg cheirníní Planet Mu a fhí le chéile mar shaghas cuairt ghaisce.

An breithiúnas?

Tiomsachán breá, ach ar chúis éigin níl spiorad ceart an cheiliúrtha ag baint leis.

---