Spéirbhean Spats Colombo
Caroline Ní Dhubhchóin i mbun comhrá faoin EP úr


Labhair NÓS le Caroline Ní Dhubhchóin, spéirbhean na n-armóiní sa bhanna Spats Colombo, faoin EP nua ‘Caught in a Bind’ a bheidh á sheoladh acu go luath.


Agus iad tagtha slán ó shéasúr gnóthach d’fhéiltí ceoil, tá na Spatadóirí ildánacha réidh lena gcéad EP, ‘Caught in a Bind’, a sheoladh ar an 9 Deireadh Fómhair.

Is i gClub Áras na nGael, Gaillimh, a dhéanfar an beart mar chuid den fhéile chultúir nua, An Áit Eile.

Bailiúchán de 5 amhrán atá san EP nua agus is deacair gan a bheith meallta aige.

Comhcheol álainn, liricí láidre, cóirithe cruthaitheacha, réimse mór stíleanna agus ábhair – tá sé ar fad ann.

Ag labhairt le NÓS di, dúirt an t-amhránaí Conallach Caroline Ní Dhubhchóin gur léiriú maith é an rogha amhrán áirithe seo ar éagsúlacht an bhanna.

“EP éagsúil atá ann sa dóigh gur meascán atá ann de na hamhráin atá i nGaeilge againn agus na hamhráin atá i mBéarla againn.

“Ó thaobh fuinnimh de, tá brí agus beocht ag baint leis an chuid is mó de na hamhráin.

“Cuir i gcás ‘Mr Misery Clown’ – tá rithim ghalánta leis.

“Shílfeá ansin gur as tír éigin eile a tháinig ‘Faoiseamh’ ó thaobh na fuaime atá taobh thiar de.

“Sampla maith é ‘Midnight Swim’ de na harmóiní a chruthaíonn muid mar bhanna ceoil agus tá sé tábhachtach dúinn go mbeadh armóiní deasa sna hamhráin againn.”

cludach

Cé nach bhfuil an leagan Gaeilge, ‘Snámh an Mheán Oíche‘, ar an EP, bíonn sé á cheol acu go minic chomh maith.

Is amhrán suaimhneach réchúiseach é, a bhfuil luas galánta leis agus is é ceann de na hamhráin é is mó a dtaitníonn le Caroline a bheith a chanadh.

Tá ‘Faoiseamh’, #4 ar an EP nua, i measc na n-amhrán is fearr le Caroline fosta. Amhrán álainn séimh faoi dhá shaol an duine – ar líne agus san fhíorshaol – atá ann.

Chomh maith le scéalta fuinniúla, tá go leor bróin agus briseadh croí i gceist leis an ábhar sna hamhráin, cé nach mbeadh a fhios sin agat i gcónaí agus tú ag éisteacht leis an rithim agus leis an bhrí a bhíonn iontu.

Is deacair cur síos ar stíl cheoil na Spatadóirí, agus seans gur sin an rud is fearr ar fad fúthu.

Tarraingíonn siad ó thobar mór rac, popcheoil, ceol tíre, folk agus trad, agus déanann siad a gcuid féin den réimse leathan ceoil atá ar fáil dóibh.

I mbliana, tá amhránaí álainn agus ceoltóir as Conamara, Gráinne Bleasdale, tagtha isteach sa ghrúpa, mar aon le Seán Reynolds ar an ghiotár agus tá an bheirt úra seo ag tabhairt éagsúlacht agus fuinneamh nua leo isteach sa bhanna.

Seachtar ceoltóirí ar fad atá sa bhanna: na hamhránaithe Caroline Ní Dhubhchóin, Simon Noble agus Gráinne Bleasdale, Micheál Ó Ciaraidh ar an fhidil, Colmán Mac Séalaigh ar na drumaí agus Breandán Feeney ar an dord.

“Bíonn sé doiligh achan duine a tharraingt le chéile mar go mbíonn siad uilig ag obair ar rudaí eile. Nuair a thagann muid le chéile bíonn píosa craice againn níos mó ná a dhath ar bith eile, agus amach as sin a thagann na hamhráin,” arsa Caroline.

spatadoiri

Is é an t-amhránaí Simon Noble a bhíonn ag cumadh na n-amhrán Béarla den chuid is mó, agus is comhoibriú atá i gceist leis na hamhráin Ghaeilge.

Is minic a bhaintear brí scaoilte as na hamhráin Bhéarla agus na leaganacha Gaeilge á gcumadh acu.

“An oíche dheireanach, thug Simon amhrán nua dúinn agus cha dtiocfadh liom aistriúchán a dhéanamh mar cha bheadh an míniú céanna i gceist leis. Scríobh mé amhrán éagsúil ach choinnigh muid leis an rithim.”

Uaireanta ansin, mar is amhlaidh i gcás ‘Dhá Bhliain’ (thíos), bíonn an dá theanga in úsáid.

Creideann Caroline go bhfuil cumhacht faoi leith ag baint leis an Ghaeilge, agus go bhfuil Gaeilge i gcroílár an bhanna go nádúrtha.

“Cha raibh muid riamh ag iarraidh seit a dhéanamh i mBéarla agus seit a dhéanamh i nGaeilge. Tá cúigear sa bhanna líofa sa Ghaeilge. Tá an stíl sin ionainn agus tá sé deacair é a mhúchadh.”

múchaidís riamh é!

Tugaigí cluas le ‘Dhá Bhliain’ (#3 Caught in a Bind)… Na Spatadóirí abú!