‘Suantraí na Nollag’ – amhrán le Méabh Ní Bheaglaoich óna halbam nua

Tá amhrán nua ón albam nua atá á chur le chéile ag an amhránaí Duibhneach Méabh Ní Bheaglaoich díreach eisithe aici. ‘Suantraí na Nollag’ an t-ainm atá ar an amhrán macarónach a eisíodh ar líne inné, agus a bheidh ar albam nua Mhéibhe atá le teacht amach i mí Eanáir.

“Bhí cara liom, an fidléir iontach Owen Spafford, as Leeds, timpeall i mí Mheán Fómhair. Bhíomar ag seinm ceoil cois na tine sa chistin, ag cumadóireacht linn, agus tháinig an písín seo ceoil chugam i mo chloigeann. Shuíos féin síos ag an bpianó agus chuireas focail leis. Bhíos ag cuimhneamh ar théama na Nollag agus na deacrachtaí atá ag daoine faoi láthair. Tá an saol ina shuan agus caithfimid fanacht istigh, ach tá dóchas ann dúinn ar fad, agus tiocfaimid as,” a dúirt Méabh le NÓS agus í ag labhairt faoin amhrán nua.

“Ní rabhas ag cuimhneamh ar leanbh ar leith agus mé ag scríobh an amhráin, ach is iad na seandaoine agus na leanaí óga, a saolaíodh le linn na paindéime, atá ag fulaingt go mór san am ait seo. Bhí mé ag iarraidh dóchas éigin a bheith ann, toisc gur féidir leis an Nollaig a bheith uaigneach go maith ar aon tslí do dhaoine. B’fhéidir nach mbeadh daoine ag dul ar a dtuairisc an Nollaig seo, agus theastaigh uaim amhrán a mbeadh sólás agus suaimhneas croí ann a scríobh,” a dúirt sí.

Amhrán macarónach, dála an amhráin eile a chuir Méabh amach níos luaithe i mbliana ‘An Lon Dubh’, is ea ‘Suantraí na Nollag’ agus liricí Gaeilge agus Béarla araon ann. Tá Méabh ag obair ar albam nua ar a mbeidh an dá amhrán, chomh maith le ‘Amhrán na nGael’, a scríobh sí don Chomórtas Pan-Cheilteach cúpla bliain ó shin. 

“Téim ag súil go mbeidh an t-albam amuigh an mhí seo chugainn, tá cúpla rud fós le déanamh leis. Tá rudaí an-chiúin i mbliana ach beidh an Síbín Orchestra ag teacht le chéile an tseachtain seo chugainn. Sin mé féin, m’athair Séamus, Muireann Nic Amhlaoibh, Éilís Ní Chinnéide Pauline Scanlon, agus daoine eile as an áit. Craolfar an seisiún sin ar líne i mí Feabhra agus b’fhéidir go mbeidh sé ar an teilifís chomh maith,” a dúirt sí.