Tiúin sa lá, 365 lá sa bhliain
Dúshlán fidléireachta na bliana úire le Fergal Scahill

Tá an fidléir aitheanta Fergal Scahill, ón ghrúpa We Banjo 3, ag tabhairt faoi rún ceolmhar na bliana úire agus tiúin a thaifeadadh, agus a roinnt ar na meáin shóisialta aige, gach lá le linn 2017.

“Ar chúis chraiceáilte éigin, tá beartaithe agam tiúin a thaifeadadh ar an fhidil gach lá in 2017, ag tosú inniu,” arsa Fergal agus a chéad fhíseán á chur i láthair aige.

“Sin 365 tiúin ar an fhidil!”

Go dtí seo, tá os coinn 38,000 radharc faighte ag an chéad fhíseán, a foilsíodh ar a leathanach Facebook ar an 1 Eanáir.

As Cora Finne in Oirthear na Gaillimhe é Fergal agus is tráthúil gur roghnaigh sé port le Paddy O’Brien, cumadóir mór de chuid an cheantair chéanna, chun tús a chur lena dhúshlán ceoil do 2017.

Tháinig deartháir Fergal, Adrian, ina theannta ar an bhosca ceoil don dara físeán agus leagan an-deas de ríl Ed Reavey ‘Fisherman’s Island’ á thabhairt uathu.

Inné, bhí Fergal i gCill Dara, agus é ag tabhairt cuairte ar an fhidléir Ryan Molloy, as Tír Eoghain ó dhúchas.

Idir stíl bhreá fidléireachta Fergal agus a chuideachta cheolmhar tá muid ag súil go mór le cluas a thabhairt do thiúin éagsúil gach lá! HUP!

Leanaigí Fergal anseo, 2017 abú!