Curach olla cniotáilte ag Deirdre McKenna as an Daingean

Tá curach olla á chniotáil ag an ealaíontóir Deirdre McKenna mar chuid de cheiliúrtha 21 bliain Áras Éanna in Inis Oírr. Beidh an curach olla seo ar cheann de 21 píosa ealaíne a bheidh ar taispeáint amuigh faoin aer ar an 17 Iúil. Coimisiúnaíodh 21 ealaíontóirí éagsúla le togra ealaíne bunaithe ar an gcurach a dhéanamh mar chuid den taispeántas sin. Cuirfear curach Deirdre McKenna ar taispeántas le 20 curach eile ar “cosán ealaíne” timpeall an oileáin. 

“Is iondúil go mbím ag péinteáil ach chuir Áras Éanna curach sé troithe chuig gach duine de na 21 ealaíontóirí agus tháinig an smaoineamh chugam é a chniotáil agus mé ag machnamh ar gheansaithe an oileáin, agus na cinn a chaitheadh na hiascairí a théadh amach sna curacha agus iad i mbun iascaireachta.

“D’úsáid mé deich gceirtlín bhána olann, 200 gram an ceann, lena chniotáil, agus beidh mé ag cur biotúmain ar an olla go luath lena dhéanamh uiscedhíonach agus dath dubh a chur air chun cuma a bheidh níos cosúla le gnáthchurach a chur air roimh an taispeántas,” a dúirt Deirdre le NÓS. 

Is as an Daingean i gCorca Dhuibhne ó dhúchas do Dheirdre, agus tá a cuid saothar le feiceáil i dtaispeántais in New York, London, Chicago, i ndánlanna ar fud na hÉireann, agus i mbailiúcháin phríobháideacha in Éirinn, sa Bhreatain, san Eilvéis, agus sna Stáit Aontaithe.     

Bunaíodh an t-ionad Áras Éanna sa bhliain 2000 chun freastal ar ealaíontóirí idir amharc-ealaíontóirí, ealaíontóirí coincheapúla, cheoltóirí, taibheoirí agus aisteoirí. Cuireann Áras Éanna spás ar fáil do na healaíontóirí seo ó gach cearn den domhan teacht agus obair a dhéanamh agus a thaispeáint don saol mór chomh maith le féilte agus ceardlanna a chur ar siúl.

Beidh trí thaispeántas ealaíne agus “gig mhór” san oileán ar siúl an mhí seo mar chuid den cheiliúradh. Beidh na taispeántais ar siúl amuigh faoin aer mar gheall ar shrianta Covid19 agus beidh an cheolchoirm ar siúl ar pháirc CLG Inis Oírr. 

“Tá an bhliain seo an-speisialta. Bhí súil againn ár gcomóradh 20 bliain a cheiliúradh anuraidh ach, mar gheall ar shrianta Covid 19, shocraigh muid gurb é seo an t-am chun ceiliúradh a dhéanamh de réir mar a thosaíonn Éire ag oscailt. 

“Bhí an-áthas orainn a bheith ag taispeáint amuigh faoin aer anuraidh nuair a maolaíodh na srianta ar feadh cúpla mí, agus feicimid an t-oileán mar áit iontach don ionad ealaíon chun ealaín a chur os comhiar an phobail,” a dúirt stiúrthóir ealaíne an ionaid, Dara McGee.