H-Pubaill
Fáilte isteach nó fan amach!

Agus an Phicnic Leictreach ag teannadh linn, is am tráthúil é le breathnú ar na dearaí nua a chuirfidh lenár gcompord agus muid ag caitheamh oícheanta amuigh faoin spéir.

Más cuimhin libh, bliain an Decagon Modular a bhí ann anuraidh, ollphuball a bhfuil spás a dhóthain do sheisear déag ann.

Bhuel, i mbliana, tá dearadh nua tagtha ar an mhargadh ar a dtugtar ‘H-Pubaill’.

Chuala muid ar fad trácht mar gheall ar H-Blocanna na Ceise Fada, mórphríosún ar imeall Bhéal Feirste inár cuireadh Poblachtánaigh agus Dílseoirí le linn na dtrioblóidí, agus níos faide anonn.

Ón spéir bhí cuma na gceannlitreacha ‘H’ ar na foirgnimh mhíchlúiteacha, a raibh de sprioc acu cimí a dhiansmachtú agus a choinneáil amach óna chéile.

Ach má cheapann tú go bhfuil an coincheap céanna i réim i ndearadh seo an H-Pubaill, bheifeá mícheart!

“Teacht le chéile” is ea é príomhsprioc na bpuball dána seo, dar le lucht a dhéanta.

Cinnte, cothaíonn an dá sciathán spás feiliúnach do bheirt ar mhaith leo oíche shuan a bheith acu ina n-aonar.

Ach is cosúil nach iad an spriocmhargadh.

Comhlacht Seapánach Doppelganger Outdoor a tháinig aníos leis an dearadh, a bhfuil gné den dánaíocht ag baint leis.

Sa tSeapáin, giorrúchán atá sa cheannlitir H a thagraíonn do ghnéas, gnéasacht nó aon rud a bhaineann le cúrsaí collaíochta.

Is ón fhocal “hentai 変態性欲’”, a chiallaíonn ‘saofóir’ sa Ghaeilge, a thagann sé.

Tá gach spás codlata 2.6 méadar ar fhad agus tá pasáiste sa lár a cheanglaíonn an dá thaobh le chéile.

Ar ndóigh, mura dtagann fonn ar bith ort ach codladh, molaimid na malaí a chur sa lár!