Míreanna mearaí gan teorainn
Ní bheidh críoch choíche leis an chluiche seo!

Is maith le daoine a bheith ina suí síos cois tine an t-am seo bliana, na míreanna mearaí beaga a scaoileadh anuas go talamh agus tabhairt faoin dúshlán iad a chur in ord arís.

Is maith le daoine freisin an píosa deireanach sin a shleamhnú isteach agus an pictiúr mar atá sé ar an bhosca a fheiceáil rompu.

Cad é faoi phuzal mar sin nach féidir a chríochnú choíche?

‘The Infinite Galaxy Puzzle’ a thugtar air, agus tá pobal na míreanna mearaí ar bís faoi.

Tá an chéad scata a cuireadh amach ar an mhargadh díolta agus tá sé fógartha ag lucht a dhéantúis go dtógfaidh sé ar a laghad mí orthu ordú nua a dhéanamh.

Níl tús ná deireadh le puzal seo an réaltra mar go bhfuil an iliomad bealach leis na míreanna mearaí a chur le chéile.

Tagann 133 píosa adhmaid le gach bosca, ina bhfuil trí chruth speisialta: spásaire, tointeálaí spáis agus satailít san áireamh.

Cruthaíonn sé íomhánna éagsúla de Bhealach na Bó Finne, a thóg an spásteileascóp Hubble.

De ghnáth cuireann míreanna mearaí dúshlán romhat na píosaí a chur le chéile ar dhóigh amháin ach tá go leor íomhánna ar méideanna éagsúla ar féidir a chruthú leis an phuzal áirithe seo.

Déantar níos casta fós é mar go bhfuil an íomhá cheannann chéanna ar dhá thaobh na bpíosaí atá curtha amach ag an chomhlacht dearthóireachta Nervous System.

Maíonn dearthóir an puzail, Jesse Louis-Rosenberg, gur féidir é a dhéanamh go deo agus nach mbeidh iomlán na n-íomhánna cruthaithe agat riamh… rud a chuireann cuma i bhfad Éireann níos fearr ar an chostas de $130!

Aimsigh an dúshlán síoraí anseo!