Tá troscán róbatach linn
Athróidh sé gach rud... i d'árasán!


Tá leaba agat. Tá drisiúr agat. Tá cófra agat. Tá deasc agat.

Anois is féidir leat iad sin ar fad bheith agat san aon phíosa troscáin amháin.

Agus, ar a bharr sin, bogann sé chun spás a chruthú sa seomra – go huathoibríoch.

Is córas nuálach troscáin é Ori a bhfuil taighdeoirí in Institiúid Teicneolaíochta Massachusetts SAM ag obair air le ceithre bliana agus a bhfuil lámh ag an dearthóir Eilvéiseach Yves Béhar ann chomh maith.

Troscán modúlach é ina bhfuil leaba in-aistarraingthe agus a dearadh le húsáid in árasáin uirbeacha nach bhfuil mórán spáis iontu.

Is féidir an leaba, agus an t-aonad ar fad, a bhogadh ach cnaipe a bhrú nó fiú trí aip ar do ghlicghuthán.

Tá Ori ceangailte leis an chúntóir pearsanta cliste de chuid Amazon, Alexa, chomh maith, a chiallaíonn gur féidir treoracha a thabhairt – ar nós ‘cóirigh an leaba’ – le do ghlór.

Faoi láthair níl Ori ar fáil ach d’fhorbróirí tithíochta ach deir siad go mbeidh an córas ar díol don mhórphobal amach anseo.

Agus é ag iarraidh níos deacra seomraí agus árasáin chuí a aimsiú i gcathracha an domhain de cheal spáis, ná bíodh aon iontas ort má fheictear tuilleadh córas róbatach mar seo i dtithe na todhchaí.

Tabhair cuairt ar orisystems.com le haghaidh breis eolais.