Gigeanna na Deichaoise – Cuid a Dó

Ravelóid, The Sugar Club, Dé hAoine 10 Meitheamh 2016

An féidir liom é a lua…?

Ravelóid.

Cinnte, bhí díomá ann nuair nár tharla an bunimeacht. Ach, cad é mar imeacht a tháinig ina áit! Ní hamháin go raibh oíche go maidin le ceol, caint agus cairdeas sa Sugar Club, (ar an Aoine a bhí an ócáid le bheith i gCaisleán Ard Giolláin), ach SRAITH IMEACHTAÍ an lá dár gcionn chomh maith i gClub an Chonartha. Leithéidí Rís, Kíla, Seo Linn agus tuilleadh nach iad ar an ardán. Ravelóid, más buan mo chuimhne…a spreag lucht Fhéile na Gealaí chun dul i mbun gnímh. Mar sin ainneoin nár tharla gach a bhí beartaithe; cuireadh síol dearfach an samhradh sin!

Féile na Gealaí, 14-16 Meitheamh 2019

Féile na Gealaí. Mar a bheadh an tOireachtas ann, buaic eile na bliana. Táim ag cuimhneamh cheana féin air… Nach iontach an toradh a bhí ar iarrachtaí Ravelóid, go bhfuil a leithéid d’fhéile i ndialanna na nGael gach Meitheamh. Cuimhním ar shamhradh 2017, le Emma Ní Fhíoruisce, Scannal, IMLÉ agus Griogair Labhruidh — gach éinne imithe bán ar fad ag canadh le KNEECAP in 2019, ainneoin gur fostaithe ag craoltóir seirbhíse poiblí a bhí cuid acu siúd a bhí ag canadh in ard a ngutha! 

Ach 2019 a fhanfaidh i mo chroí go deo – cairde maithe, dea-ghiúmar, atmaisféar agus spiorad gan trácht fiú ar an gceol breá – Dáithí, Méabh Ní Bheaglaoich agus Niteworks i measc go leor eile. 

Damien Dempsey, Sráid Bhiocáire, 22 Nollaig 2018

Tá nósanna áirithe ag ceoltóirí aimsir na Nollag. Seisiún buscála ar Shráid Grafton cuirim i gcás, le réalta móra na hÉireann, ag bailiú airgid do charthanachtaí Oíche Nollag; nó Kíla i Sráid an Bhiocáire fadó, agus anois go rialta an t-am seo bliana sa National Stadium. 

Damo Dempsey fear eile a chloínn le nós, le coirmeacha seachtain na Nollag i Vicar St. Bhí deis agam a bheith i láthair anuraidh nuair a líon sé an t-ionad le grá, fuinneamh, anam agus croí.

In ard a ghutha a scaoil sé lena liricí spreagúla amach as a bhéal; an lucht féachana mar a bheadh fonnadóirí taca ann, gach focal de ghlan mheabhair agus iad breá sásta sin a léiriú. Fiú agus Damien bailithe leis ón stáitse, chan taobh amháin an tslua, ‘Love Yourself’, agus an taobh eile á bhfreagairt, ‘Today’, an líne á athrá arís agus arís eile acu agus iad ag sleamhnú leo amach as an ionad…. 

Britney Spears, 3Arena, 20 Lúnasa 2018

SAN JOSE, CA – DECEMBER 03: Britney Spears performs at the NOW 99.7 Triple Ho Show 7.0 at SAP Center on December 3, 2016 in San Jose, California. (Photo by Steve Jennings/WireImage)

Níor stad an ceol, ó thús go deireadh. Ba thrua ar shlí mar bheadh sé go deas a bheith tar éis í a chlos i mbun cainte idir na hamhráin, ach ar an láimh eile… bhuel…a leithéid de cheolchoirm! 

Lúnasa, 2018; bhí oiread cainte déanta faoi chuairt an Phápa Francis chuig an dtír an mhí sin, ach is ar ‘Britney, bitch’ a bhí mo chuid airde dírithe. Ainneoin gur robotic a thug léirmheastóirí áirithe ar a taispeántas, níor lig sí síos mé ná chuid mhór mhaith den slua a bhailigh isteach chuig an 3Arena i mBaile Átha Cliath! 

Mám, Déardaoin 26 Meán Fómhair 2019, O’Reilly Theatre, BÁC

Ní ceolchoirm ann féin a bhí i Mám, ach seó rince agus aisteoireachta chomh maith, a bhain stangadh asam níos luaithe i mbliana le linn Fhéile Amharclannaíochta Átha Cliath. Cormac Begley, fear an chonsairtín, a choimeád comhluadar linn i rith an taispeántais agus scata rinceoirí oilte, cumasacha ag insint scéil ag an aon am.

Bhí cumhacht dochreidte ag baint leis an saothar seo de chuid Michael Keegan-Dolan agus an comhlacht Teaċ Daṁsa, go mbím fós ag cuimhneamh air, ó am go ham. Gafa go hiomlán ag na cultacha, an comhordú, an coincheap agus an chraic fhiáin. Rachainn chun é a fheiscint arís ar maidin, dá mbeadh an deis agam.