Kíla i BÁC agus imeachtaí eile

Taispeántas Ealaíne, Abandoned, Not Forgotten // Dánlann Dillon, Cultúrlann McAdam Ó Fiaich, go dtí an 6ú Eanáir ’20

Bíonn deis againn sa thréimhse idir dhá Nollaig na cúraimí a fhágtar ar an méar fhada a chur dínn. Dírímse ar pháipéarachas den chuid is mó agus cuairteanna orthu siúd nach raibh deis agam a fheiscint i rith na bliana. 

Nós eile ná súil a chaitheamh ar thaispeántais leanúnacha, ná feaca go fóillín. Má tá sibh cosúil liomsa, bí ar an eolas go bhfuil an taispeántas ealaíne ‘Abandoned, Not Forgotten’ fós ar crochadh i nDánlann Dillon i gCultúrlann McAdam Ó Fiaich. 

Saothar leis an ealaíontóir físe Lise McGreevy, a chaith seal ina fhísiriseoir chomh maith, atá i gceist – bailiúchán ghrianghraf de thithe tréigthe i nDún na nGall. Tá baint ag an gcumadóir ceoil Marie Therese Davis, an file Jim Johnston agus fear déanta scannán Paul Whittaker leis an taispeántas seo agus saothar bunaithe ar na grianghraif cruthaithe acu. 

Beidh deis ag cuairteoirí gach a bhaineann leis an gcomhthionscnamh seo a fheiscint agus a chlos, má théann siad chuig Dánlann Dillon, sa Chultúrlann.

Seisiúin Cheoil in Áras Chrónáin // Cluain Dolcáin, 21, 22, 28, 29 Nollaig óna 21:30

Seisiúin Cheoil in Áras na nGael // Gaillimh, 21, 28 Nollaig óna 21:00

Tá seisiúin cheoil beartaithe d’Áras Chrónáin amuigh i gCluain Dolcáin i gcaitheamh na Nollag. Leithscéal chun an tigh a fhágáil agus deis dul i mbun cainte le comhluadar nua, ar eagla go mbeadh an Cabin Fever ag cur as daoibh! 

Tá cúpla dáta luaite leis na seisiúin thraidisiúnta, as seo go deireadh na bliana. Bain bús as, má bhíonn sibh i láthair!

Mar a chéile in Áras na nGael sa Ghaillimh agus a leithéid d’ócáid ar bun acu siúd gach Satharn i rith na bliana ar fad. Is amhlaidh a bheidh arís i rith na Nollag agus béim acu ar an gceol traidisiúnta!

Kneecap (agus ceoltóirí eile) // Electric Ballroom, Droichead Átha, Dé hAoine 20 Nollaig @ 21:00

Bhí bliain mhór ag geabairí an bhanna Kneecap agus iad ag scaipeadh a gcuid ceoil ag féilte móra agus beaga na tíre. Mura bhfuil soiscéal na leaids cloiste agaibh go dtí seo i 2019, tá deis amháin eile agaibh! Is i nDroichead Átha a bheidh siad ar an Aoine san Electric Ballroom. Cloisfear ceol chomh maith ar an oíche ó leithéidí Why-Axis, Chantel Kavanagh agus aoi cheoltóirí eile, (is féidir an liosta iomlán a fheiscint ar leathanach Facebook Reboot Events), atá á eagrú. Seo coirm dheireanach na bliana ag Móglaí  Bap, Mo Chara agus DJ Provaí – tapaigh an deis a chairde!

Kíla // Staid Náisiúnta, BÁC, Dé Sathairn 21 Nollaig @ 19:00

Beidh Kíla arís i mbliana sa Staid Náisiúnta! Geall leis ócáid rialta an t-am seo bliana, faoin dtráth seo! Is i gcomhar le O’Hara’s Irish Craft Beers, agus le tacaíocht ó Fhoras na Gaeilge, Raidió na Life, Whelan’s agus Gardiner Music atá an choirm eagraithe. Má tá dream agaibh ann agus suim agat slua a thabhairt leat, d’fhéadfá laiscne do ghrúpa a fháil ach teagmháil a dhéanamh le caoimhe@Gardinermusic.net

Bí ann, mar a chanadar féin!