COMÓRTAS: Beart leabhar le buachan do Leabhra Feabhra

Tá Leabhra Feabhra nach mór buailte linn, an fhéile nua a bunaíodh sé bliana ó shin le léitheoireacht na Gaeilge agus foilsitheoireacht na Gaeilge a chur chun cinn, agus tá duais bhreá againne anseo in oifig NÓS ón Siopa Leabhar ar Shráid Fhearchair — mála mór leabhar!

Tá cúig leabhar sa mbeart seo atá roghnaithe ag bainisteoir an tsiopa, Gráinne Ní Mhuilneoir, do léitheoirí dílse NÓS. 

Níl le déanamh agat ach croí a thabhairt don phictiúr seo ar Instagram, ordóg a thabhairt don phostáil seo ar Facebook agus é a roinnt, nó athghiolc a dhéanamh ar an ngiolc seo ar Twitter le bheith san áireamh don duais iontach seo.

Cur i gCéill Celia de Fréine


Is síceolaí í Cass Ó Caoimh a bhogann go Conamara nuair a fhágtar ina baintreach í. Mar aon leis an bpostroinnt atá aici san Ionad Leighis áitiúil, glacann sí le post páirtaimseartha i gCeannáras na nGardaí mar shíceolaí fóiréinseach. Nuair a bháitear Niamh, cara a hiníne, creideann Cass gur dúnmharaíodh an ógbhean ainneoin an mhéid a cheapann an Bleachtaire Cigire, Tom Breasal, a hiarleannán. Le cúnamh ón iriseoir Gearóid, mac Tom, agus ó dhaoine a gcuireann sí aithne orthu, déanann sí bás Niamh a fhiosrú agus tugann scéal scáfar chun solais. San am atá díreach thart atá an coirscéinséir eachtrúil seo suite.

An Diabhal Déanta Joe Steve Ó Neachtain

Is fada an lá é molta scéal chuile dhuine a bheith agatsa ach gan do scéal féin a bheith ag duine ar bith. Ach is mór an mhaith nár thug Joe Steve Ó Neachtain mórán airde ariamh ar an gcomhairle sin. Mar is é atá sa saothar seo uaidh meascán dá scéal féin agus taithí dhaoine eile, beagáinín beag bídeach de scéal an ghamhna bhuí agus oiread na fríde de phaidir an chapaill, an scéal fada giorraithe agus fad bainte as an scéal gearr. Sa gcnuasach seo cíortar ábhair mar an saol mór ag brú isteach ar an mbaile beag, an rachmas ag srachailt leis an mbochtanas, agus an grá agus an briseadh croí in árach a chéile gan stad gan staonadh. 

Cath Fionntrá Aogán Ó Muircheartaigh agus Dómhnal Ó Bric 

Tá Cath Fionntrá ar cheann de scéalta móra na Fiannaíochta. Cur síos ar choimhlint ghaisciúil idir Dháire Donn, Rí an Domhain agus na Fianna atá ann. Lean an choimhlint mharfach san gan staonadh ar feadh bliana agus lae. 

Harry Potter agus an Órchloch JK Rowling/Máire Nic Mhaoláin

Níor shamhail Harry Potter go raibh sé éagsúil le gasúir eile nó gur thug arracht d’fhear mór dúshúileach tarrtháil air agus gur chláraigh sé i Scoil Draíodóireachta Hogwarts, áit ar fhoghlaim sé le Quidditch a imirt, agus a ndearna sé troid go himirt anama. Cad chuige, meas tú? Mar gur DRAÍODÓIR É HARRY POTTER!

An Litir* Liam Mac Cóil

Gaillimh, Earrach na bliana 1612. Tá an chathair trí chéile ag ráflaí, brúidiúlacht, agus ansmacht; an tír ar fad faoi cheannas Shasana; agus  Aodh Mór Ó Néill agus na taoisigh Ghaelacha sa Róimh. Leagtar cúram ar Lúcás Ó Briain – Gaillimheach óg a thabharfar as a chathair dhúchais ar aistear fada thar lear. Ach ar a shála tá an Sionnach, duine de na spiairí is glice agus is cruálaí atá ag an namhaid, agus orduithe aige stop a chur leis, ar ais nó ar éigean.

Seo é an chéad chuid de thriológ a thabharfaidh trasna na hEorpa muid i gcomhluadar Lúcáis Uí Bhriain i mblianta tosaigh na 16ú hAoise, agus naimhde brúidiúla sna sála orainn.

*Féadtar aon leabhar de Thríológ na Litreach (An Litir, I dTír Strainséartha Bealach na Spáinneach) a roghnú don duais.