Lucas: An t-ealaíontóir a bhíonn ag ealaíon lena chuid ealaíne

Tháinig an scannán Star Wars: The Rise Of Skywalker amach inniu. An scannán, dar le muintir Disney, a chuirfidh deireadh le scéal na Siúlaithe Spéire (oibríonn an t-ainm níos fearr as Gaeilge nach n-oibríonn) 42 bliain tar éis do Luke breith den chéad uair ar a chlaíomh solais féin (ok, stopfaidh mé anois). 

Ach, chomh maith leis an scannán The Rise Of Skywalker, tháinig na sean-scannáin ó na hochtóidí ar an suíomh sruthaithe nua Disney+ an mhí seo caite, agus thug daoine faoi deara go raibh rud éigin difriúil leo. 

Is cosúil, go ndearna Lucas cúpla athrú lena chuid seanscannán sular dhíol sé le Disney iad. An t-athrú mór a rinne sé? Deireann an carachtar Greedo “Maclunkey” sula maraíonn Han Solo é. Athrú riachtanach is cosúil. Ach ní raibh ionadh ar dhuine ar bith, mar is ealaíontóir é George Lucas atá tógtha le bheith ag ealaíon lena chuid ealaíne. 

Is aisteach agus is spéisiúil an duine é Lucas. Stiúrthóir a bhfuil fís ar leith aige dá chuid scannán, agus cé go raibh na scannáin Star Wars ó thús na mílaoisego dona (agus ná déanaimis dearmad go raibh siad go dona, mar is go dona a bhí siad agus go fíordhona), ní féidir a rá nárbh iad fís Lucas. 

Ach an rud is aistí faoi Lucas, ná go bhfuil sé tógtha leis an smaoineamh go gcaithfidh sé rudaí a athrú. Bhí fadhbanna go leor aige agus é ag déanamh an scannáin A New Hope in 1977 agus nuair a fuair sé an chumhacht agus an t-airgead, is cosúil gur shíl sé go raibh sé in ann na “lochtanna” a bhí ann a shocrú.

Ach nuair a rinne sé é sin, bhain sé ó dhraíocht na scannán.  Tá mórchuid de na hathruithe beag bídeach, ach bhain siad ón taithí a bhíonn ag daoine leis na scannáin a chonaic siad agus iad óg. 

Agus tar éis chuile athrú a dhéanann sé, tagann an cheist chéanna chugam. Cé leis an ealaín? An t-ealaíontóir a rinne i dtosach é? Nó an lucht féachana a d’íoc airgead as é a fheiceáil? Bíonn éifeacht ag na hathruithe beaga seo ar an píosa ealaíne ina iomlán, go dtí nach féidir an píosa nua a aithint ón rud a chuaigh i bhfeidhm ar dhaoine ó thús, rud a déarfainn nach n-aontaíonn Lucas leis. Ach nach bhfuil an cead sin aige? Is é a chruthaigh iad, ag deireadh an lae.

Sea is é Lucas a rinne na scannáin seo, ach agus iad amuigh os comhair an tsaoil, tá sé ródhéanach aon athrú a dhéanamh leo. Ní bhíonn ealaín foirfe. Tá brí agus fuinneamh na healaíne le fáil sna lochtanna agus sna botúin. Bhí spiorad Star Wars sna botúin.

Ach freisin, ar ndóigh, bhí airgead le déanamh as iad a athrú. Tá mé ag dul dearcadh ciniciúil a thógáil anseo ar feadh tamaill. Rinne Lucas go leor airgid as na scannáin chéanna a eisiúint chuile chúpla bliain le roinnt athraithe beaga bídeacha. 

Ansin dhíol sé le Disney iad in 2012, daoine dar leis, a chuir iallach air, agus comhlacht nach bhféadfadh bheith níos difriúla uaidh féin. Ach an bhfuil siad chomh difriúil sin óna chéile? Tá Disney iad féin tógtha le bréagáin agus cluichí a dhíol agus cosúil le Lucas, níl Disney sásta aon rud a fhágáil mar atá agus bogadh ar aghaidh go dtí rud éigin nua, mar tuigeann siad, mar a thuig George Lucas, go bhfuil airgead le déanamh as cuimhní na hóige. Agus ag deireadh an lae, nach shin é spiorad Star Wars i ndáiríre? 

Go mbaine sibh taitneamh as an scannán nua!