Na scannáin is fiú a fheiceáil in 2021

Fáilte chuig an mbliain nua! I ndiaidh spraoi agus solais na Nollag, seans maith go bhfuilimid uile in ísle brí. Tá an todhchaí éiginnte go fóill, agus tá tionscal na scannán i lár roinnt athruithe ollmhóra a chur i bhfeidhm. Ní dóigh go mbeimid in ann dul chuig an bpictiúrlann go luath, agus bhí roinnt de scannáin seo leanas le teacht amach an bhliain seo chaite. Le cúnamh Dé, beidh na scannáin seo ar fáil ar bhealach éigin i mbliana.

Judas and the Black Messiah (stiúrthóir: Shaka King) 

Bunaithe ar fhíorscéal Fred Hampton, cathaoirleach na Black Panthers in Illinois, agus an feallmharú a rinne an gníomhaire FBI William O’Neal air, tá dhá thaispeántas láidre anseo ó na príomhaisteoirí Daniel Kaluuya (Get Out) agus LaKeith Stanfield (Sorry to Bother You). Eiseofar i mí Feabhra é.

Last Night in Soho (stiúrthóir: Edgar Wright)

Scannán uafáis ar bhealach agus scannán ficsin eolaíochta ar bhealach eile, insítear sa scannán nua seo ón stiúrthóir Edgar Wright (Shaun of the Dead, Scott Pilgrim Vs. the World) bean óg atá tógtha le cúrsaí faisin agus í in ann taisteal siar chuig na 1960idí. Níl dáta cinnte eisithe ann go fóill, ach deirtear go mbeidh fáil air i mí Aibreáin.

Godzilla vs. Kong (stiúrthóir: Adam Wingard)

Mura bhfaca tú Kong: Skull Island cheana féin, breathnaigh air sula n-eiseofar an scannán leanta seo. Le cois dhorchacht na scannán Godzilla a stiúir Gareth Edwards agus Michael Dougherty le déanaí, agus an greann a thug an stiúrthóir Jordan Vogt Roberts do Kong: Skull Island, beidh sé suimiúil a fheiceáil cén ton a chuirfidh Adam Wingard ar an gcogadh idir an dá arrachtach. Beidh orainn fanacht go dtí an 20 Bealtaine chun é sin a fheiceáil.

Zola (stiúrthóir. Janicza Bravo)

Seans maith ann go bhfaca tú an snáithe Twitter ar a bhfuil an scannán seo bunaithe. I 2015, scríobh Aziah “Zola” Wells 148 tvuíteanna faoi striapach ar bhuail sí léi i mbialann, agus an scéal aisteach dúnmharaithe a tháinig ina dhiaidh. Caithfidh gurb é seo an chéad scannán riamh bunaíodh ar shnáithe mearscaipthe, agus beidh fáil air i mí an Mheithimh.

Candyman (stiúrthóir Nia DaCosta)

Bhí an scannán seo le teacht amach i mí an Mheithimh an bhliain seo chaite, ach chuir COVID-19 cosc ar an eisiúint. Anois, agus dáta nua socraithe don 27 Lúnasa, beimid uile in ann taitneamh a bhaint as an scannán leanta “spioradúil” do scannán 1992. Agus Jordan Peele (Get Out, Us) ar bord mar léiritheoir, is féidir linn a bheith ag tnúth le rud éigin fíor-scanrúil.

Dune (stiúrthóir. Denis Villeneuve)

Tá sé deacair go leor teacht i ndiaidh leagan Dune le David Lynch ó 1984, ach thaispeáin an stiúrthóir Denis Villeneuve nach bhfuil eagla air obair le scéalta ficsin eolaíochta ar a bhfuil clú mór, cáil agus tóir nuair a stiúir séBladerunner 2049 in 2017. Táthar den tuairim nach féidir an scéal eipiciúil le Frank Herbet a aistriú ina scannán maith ar chor ar bith. Gheobhaimid amach ar an 1 Deireadh Fómhair.

The United States vs. Billie Holiday (stiúrthóir. Lee Daniels)

An t-aon scannán eile ar an liosta seo atá bunaithe ar fhíorscéal ná The United States vs. Billie Holiday. Cé go mbaineann sé den cuid is mó le saol brónach an amhránaí Mheiriceánaigh, tá fócas mór ar an gciníochas agus an chonspóid a tharraing sí agus í ag iarradh a hamhráin cháiliúil ‘Strange Fruit’ a thaifeadadh. Beidh an scannán ar fáil i mí Feabhra ar Hulu.