Tús á chur le Liú Lúnasa inniu

Cuireadh tús inniu le Féile Liú Lúnasa, an fhéile Fheirsteach ealaíon, inniu agus beidh idir cheolchoirmeacha, chainteanna, agus ar ndóigh an Slam cáiliúil Filíochta, as seo go dtí an Domhnach. 

Seo an séú bliain atá an fhéile á reáchtáil, ach fearacht go leor imeachtaí eile i mbliana, is ar líne atá féile na bliana seo ar siúl. 

I measc na n-imeachtaí sin beidh ceolchoirm a shruthófar beo as amharclann na Cultúrlainne, pléphainéal ar chúrsaí comhshaoil, agus, ar ndóigh, Slam Filíochta Liú Lúnasa — an t-aon chomórtas slam Gaeilge in Éirinn. 

Is é an Slam buaic na féile, agus bronnfar duaischiste £700 ar bhuaiteoirí chomórtas na bliana seo. Reáchtáladh an imeacht sa gCultúrlann ar Bhóthar na bhFál agus sa Black Box i lár chathair Bhéal Feirste roimhe seo, ach is i bhfoirm físeáin a chuir na filí a saothar faoi bhráid na moltóirí i mbliana. Craolfar na físeáin sin ar YouTube ag 20.30 amárach, agus fógrófar an buaiteoir. 

“Tá muid iontach sásta go dtig Slam Filíochta Liú Lúnasa a reáchtáil go fóill i mbliana in aineoinn Covid-19. Tá an Slam i ndiaidh cruthaitheacht dochreidte a spreagadh in iomaitheoirí iontacha an chomórtais thar na blianta.

Den chéad uair, beidh an comórtas á reáchtáil ar líne againn agus mar gheall air sin, tá muid ag dúil go mór píosaí slamfhilíochta ó dhaoine fud fad na cruinne a fheiceáil mar chuid de chomórtas na bliana seo. Tá lear mór cruthaitheachta i ndiaidh eascairt as an phaindéim le roinnt míonna anuas agus tá muid ag súil go mór ardán a thabhairt do shaothar an ama seo ag Slam Filíochta Liú Lúnasa 2020,” a dúirt Caoimhe Ní Chathail, eagraí an chomórtais le NÓS.

Is é Séamus Barra Ó Súilleabháin a bheidh ina mholtóir ar an gcomórtas agus is í Sinéad Ní Uallacháin an tí seo a bheidh ina bean tí.

Roimhe sin, beidh ceolchoirm ann le Brighde Chaimbeul as Albain, Jamie Murphy as Béal Feirste, agus Edel Ní Churraoin as Cois Fharraige. 

Dé Sathairn, is é Ailbhe Ó Monacháin ó Nuacht RTÉ/TG4 a bheidh ina chathaoirleach ar phainéal cainte faoi chúrsaí comhshaoil ‘An Timpeallacht: Gníomh Pearsanta a Dhéanfaidh Difear”. Ar an bpainéal sin beidh an Dr Emma Verling ó Choláiste na hOllscoile, Corcaigh; Jone Ugarteburu ó Ollscoil na Ríona, Béal Feirste; Tara Nic Giolla Seanáin ó Choláiste na Tríonóide; agus Rónán Ó Dálaigh. 

Craolfar an painéal cainte beo ar Facebook na féile agus ar Raidió Fáilte. Beifear in ann éisteacht leis ar an gcóras FM nó ar sheinnteoir idirlín an stáisiúin. 

Is iad Bréag a bheidh ar ardán digiteach na féile le clabhsúr a chur le rudaí oíche Dé Sathairn ag 20.30.