Líon na mban in Ainm.ie ag dul in airde ‘más go mall féin é’

Tá admhaithe ag Fiontar in DCU, an dream atá taobh thiar den suíomh beathaisnéisí Gaeilge Ainm.ie go bhfuil ganntanas ban ar an mbunachar de dhaoine mór le rá i stair na Gaeilge, ach go bhfuil líon na mbeathaisnéisí faoi mhná atá ar an suíomh “ag dul in airde, más go mall féin é. 

Tá os cionn 1,700 beathaisnéis ar Ainm.ie, agus is beathaisnéis fir atá i gceist le 90% (1,593) acu sin. Níl ach 176 beathaisnéis faoi mhná ar an suíomh i láthair na huaire. Deir Fiontar, atá lonnaithe in DCU agus a thugann aire do na suíomhanna Logainm.ie agus Téarma.ie freisin, gur “léir don dall” go bhfuil easpa ban in Ainm.ie ach gur “fadhb aitheanta” í i gcúrsaí beathaisnéise go mbíonn “gannionadaíocht i gceist le grúpaí áirithe” i gcnuasaigh ar fud an domhain. 

Cuirtear beathaisnéisí nua le Ainm.ie go tráthrialta, agus ní chuirtear cuntas ar dhaoine atá fós beo ar an suíomh. An mhí seo caite, cuireadh ochtar eile ar an mbunachar: Domhnall Mac Síthigh, Aodh Ó Domhnaill, Proinsias Ó Mianáin, Josie Sheáin Jeaic Mac Donncha, Peadar Lamb, Seán Ó HÉalaí, Diarmad Ó Doibhlin, agus Aodán Mac Póilín. 

Tharraing an rogha beathaisnéisí seo cáineadh mar gheall gur fir ar fad a bhí san ochtar a roghnaíodh le cur leis an suíomh. Deir Fiontar go raibh a n-áit “tuillte go maith” ag an ochtar fear ach go n-aithnítear go bhfuil easpa ban ar an suíomh. 

“Ní miste a rá go bhfuil líon na mban in Ainm.ie ag dul in airde, más go mall féin é. Mná iad 22.4% de na beathaí a scríobhadh ó 2013 i leith, mar shampla. Creideann muid go rachaidh an ráta seo in airde de réir a chéile.

“Tá tionscadail éagsúla beathaisnéisí tar éis aghaidh a thabhairt ar an gceist trí thaighde breise a dhéanamh ar bheathaí a fágadh ar lár sna bunfhoilseacháin agus trí imleabhair bhreise nó forlíontáin a fhoilsiú chun cuid de na heasnaimh seo a chúiteamh,” a dúradh i ráiteas a d’eisigh Fiontar inniu.