‘An í an Bhreatnais an teanga is lú tairbhe ar domhan?’ – raic faoi cheist láithreora teilifíse

Tá raic ann sa Bhreatain Bheag faoi láthair mar gheall ar mhír a craoladh ar Sky News faoin mBreatnais ar Lá Idirnáisiúnta na Máthairtheangacha. Bhí an t-ilteangaí Alex Rawlings, fear a bhfuil 15 teanga ar a thoil aige, ag labhairt ar an gclár faoin gceiliúradh idirnáisiúnta a bhí ar bun inné ar theangacha na cruinne. 

D’fhiafraigh an láithreoir, Isabel Webster, den saineolaí teanga cé acu teanga ba lú tairbhe agus rinne gáire nuair a dúirt duine d’fhoireann an chláir “an Bhreatnais” léi trína cluasán. 

“Is breá liomsa an Bhreatnais agus is breá liom cuairt a thabhairt ar an mBreatain Bheag. Ní dóigh liom go bhfuil a leithéid de rud ann ach teanga gan tairbhe. Más féidir leat teanga a úsáid a le labhairt le daoine, tá tairbhe inti. Más féidir leat teanga a úsáid le foghlaim faoi chultúr, tá tairbhe inti. 

“Is cuma cé chomh mór ná chomh beag is atá an pobal sin. Tá mé an-bhródúil as na teangacha dúchais atá againn sa Ríocht Aontaithe, an Bhreatnais, an Ghàidhlig agus an Ghaeilge, agus cuirtear chun cinn iad mar chuid den tír seo agus ba bhreá liom dá leanfaí leis sin,” a dúirt sé. 

Agus é ag scríobh ar Twitter i ndiaidh an chláir, dúirt Alex Rawlings gur baineadh an chaint de nuair a chuir bean Sky News an cheist air. 

“Fiafraíodh díom ar Sky News inniu agus mé faoi agallamh do Lá Idirnáisiúnta na Máthairtheangacha arbh í an Bhreatnais an teanga is lú tairbhe ar domhan. Níor fágadh focal agam,” a scríobh sé. 

Ní mó ná sásta a bhí an láithreoir Sasanach, a dúirt go raibh sí pósta le Breatnach agus nach raibh sa cheist ach píosa spraoi.

“Wow Alex, that’s what you took away from the interview? I’m married to a Welshman — it was clearly banter. Oh well,” a dúirt sí.