An 4,000,000ú Tweet i nGaeilge seolta…ag sagart Gaeltachta

Ba é an tAthair Brian Ó Fearraigh, as paróiste Ghaoth Dobhair i nGaeltacht Dhún na nGall, a sheol an 4,000,000ú giolc as Gaeilge ar Twitter, de réir anailíse a rinne an tOllamh Kevin Scannell ó Ollscoil St Louis in Missouri.

Pictiúr den leabhar tinrimh a bhí ag Scoil Náisiúnta Chnoc an Stolaire i nGaoth Dobhair sa bhliain 1946 a bhí sa ghiolc a chuir an sagart aitheanta Gaeltachta amach ar a chuntas pearsanta, agus é ag trácht ar an “bhfoghlaim ón mbaile”. Dúnadh an scoil bheag Ghaeltachta in aimsir na Féile Pádraig mar gheall ar ráig den bhruicíneach a scaipeadh trithí an bhliain sin.

Coinníonn an tOllamh Scannell cuntas ar úsáid na Gaeilge ar líne agus tá taifead déanta aige den 1,000,000ú, 2,000,000ú, agus 3,000,000ú giolc freisin.

Ba in 2006 a seoladh an chéad ghiolc i nGaeilge ar Twitter, cúpla mí i ndiaidh bhunú an tsuímh. Ba í an t-úsáideoir @aine a chuir an chéad ghiolc sin amach mí Nollag na bliana sin.

D’imigh beagnach deich mbliana tharainn sular sáraíodh an milliún tvuít. Sheol @OideasGael, cuntas oifigiúil Twitter an choláiste Gaeilge do dhaoine fásta i nGleann Cholm Cille, an 1,000,000ú giolc Domhnach Cásca 2015 agus beannachtaí na féile á nguí ar lucht a leanta.

An múinteoir Trevor Herbert i mBaile Átha Cliath, a sheol an 2,000,000ú giolc mar fhreagra ar phictiúr de chomhartha Gaeltachta a chuir Sorcha Ní Riain, as oirthear Chorcaí, suas ar an suíomh ar an 22 Iúil 2017. 

Ba é an láithreoir raidió Aindriú de Paor, a bhí ag obair leis an gclár Cormac ag a Cúig ar RTÉ Raidió na Gaeltachta in 2019 a sheol an 3,000,000ú giolc:

Ocht mbliana, trí mhí, agus 19 lá a thóg sé ar phobal na Gaeilge an 1,000,000ú giolc a bhaint amach. Dhá bhliain, trí mhí, agus 18 lá a bhí ann sular seoladh an 2,000,000ú giolc. Bliain, sé mhí, agus naoi lá a bhí ann idir é sin agus an 3,000,000ú giolc, agus bliain, 11 mí, agus 23 lá a bhí ann idir an giolc sin agus an 4,000,000ú ceann an tseachtain seo caite.