Na cláir spóirt is fearr ar Netflix
moltaí Phóilín Nic Géidigh

Agus na Cluichí Oilimpeacha ar ceal i mbliana, ní bheidh muid ábalta a bheith ag déanamh iontais de na lúthchleasaithe iontacha ná á gcáineadh ón tolg. Tá rud eile de dhíth orainn le bheith ag amharc air agus ag rá “thiocfadh liom féin sin a dhéanamh”. 

Mar sin, tá liosta cláracha agus scannán faisnéise atá ar fáil ar Netflix curtha le chéile anseo, agus fócas ar na scileanna spóirt sin le feiceáil go dlúth iontu. 

Magnetic

Tá na céadta daoine ar fud an domhain atá go hiomlán gafa leis an spórt guaisbheartaíochta — idir shurfáil ar thonnta atá chor a bheith 20 méadar ar airde i Nazaré na Portaingéile, agus sciáil agus chlársciáil nach bhféadfaí a chreidiúint. Leanann an scannán faisnéise seo, a stiúir Thierry Donard, na lúthchleasaithe agus iad i mbun na spórt dainséarach seo, agus iniúchtar an tarraingt agus tionchar atá ag na dálaí dochreidte seo orthu, chomh maith leis na cúiseanna a fhilleann siad ar na spóirt arís agus arís eile. 

Formula 1: Drive to Survive

Má shíleann tú nach bhfuil aon suim agat i gcúrsaí Foirmle a hAon, athróidh an tsraith seo ar Netflix an meon sin. Tugann Formula 1: Drive to Survive léargas cúlstáitse ar thiománaithe agus rásaí Chraobhchomórtais Dhomhanda Fhoirmle a hAon 2018 agus 2019. Tá dhá shraith ar fáil ar Netflix faoi láthair, ina n-amharctar ar fhoirne McLaren, Ferrari agus Mercedes, i measc ainmneacha móra eile na hearnála, agus iad ag streachailt a n-iomaitheoirí a ghríosú leis an Chorn Domhanda a bhuachtaint.

The Last Dance

In The Last Dance, caitear súil ar Michael Jordan, duine de na himreoirí cispheile is clúitigh ar domhan, agus pearsa ollmhór sa chultúr choitinn agus i saol an spóirt. Le linn shéasúr cispheile NBA 1997-98, thug foireann na Chicago Bulls cead do chriú scannánaíochta iad a leanstan ar feadh na bliana, agus úsáidtear go leor de na míreanna sin sa chlár faisnéise seo. Idir na hagallaimh a dhéanann siad le Michael Jordan é féin, le himreoirí eile agus le foireann bainistíochta na Chicago Bulls, tugann sé léargas ar dóigh ar na blianta sin ina raibh na daoine seo i mbarr a réime. 

Cheer

Tá Craobhchomórtas Náisiúnta an Ghárthaigh Mholta bainte ag Coláiste Navarro trí huaire déag go dtí seo. Leanann an tsraith Netflix Cheer lúthchleasaithe den scoth atá ag freastail ar an choláiste agus iad ag déanamh réidh do chomórtas mór na bliana in Daytona Beach. Níl ach bliain amháin fágtha ag an mhórchuid acu san earnáil, mar nach bhfuil aon chomórtas ann do dhaoine fásta i ndiaidh na hollscoile, ach d’achan duine acu, tá cuid mhór i ngeall leis an bhliain seo i Navarro.