Ó YouTube go TG4
Beirt láithreoirí úra ag bualadh an scáileáin mhóir


Labhair NÓS leis an bheirt láithreoirí óga, Éadaoin Nic Mhuiris agus Caoimhe Ní Chathail, atá taobh thiar den chainéal YouTube Gaeilge ‘Tusa Tube’ faoina sraith úrnua a chraolfar ar TG4. Agus chuir siad físeán speisialta le chéile dúinn chomh maith!


Faoi láthair, tá Éadaoin Nic Mhuiris agus Caoimhe Ní Chathail, a tháinig i réim ar an chainéal YouTube ‘Tusa Tube’, i mbun taifeadta dá sraith úrnua WAC a bheas á craoladh ar TG4 san fhómhar.

Le breis agus coicís de scannánú déanta, deir Caoimhe gur fíorú aislinge don bheirt é sraith teilifíse don stáisiún Gaeilge a chur i láthair.

“Seo an bhrionglóid a bhí againn ón tús,” arsa bean Leitir Ceanainn.

“Bhí muid go mór ag iarraidh a bheith inár láithreoirí teilifíse agus bheith ag obair le TG4.”

Craobhchomórtas ainmhithe atá i gceist le WAC, bunaithe ar mhúnla shraith rathúil de chuid ABC na hAstráile a sheasann do na túslitreacha ‘World Animal Championships’.

Dírithe ar pháistí naoi mbliana d’aois, cuirtear ainmhithe do gach cineál i gcomórtas lena chéile le linn na sraithe.

Mar a bheadh Pinky and the Brain ann is díséad greannmhar iad Éadaoin agus Caoimhe a bhfuil carachtair ar leith acu.

“Tá mise mar a bheadh duine dúr ann agus is í Caoimhe an duine cliste agus tá orm go leor ceisteanna a chur uirthi le fáil amach faoi na hainmhithe – tá go leor eolais ann ach ábhar grinn chomh maith,” arsa Éadaoin, arb as an Inbhear Mór di.

Tá físeáin á gcur le chéile agus á bhfoilsiú go rialta ar Tusa Tube acu faoina bhfuil ar siúl ar an seit.

Is cairde ollscoile iad Caoimhe agus Éadaoin atá i lár céimeanna cumarsáide in Ollscoil Chathair Bhaile Átha Cliath.

Thosaigh siad an cainéal Gaeilge ar líne Tusa Tube i mí Aibreáin seo caite agus iad ag iarraidh “bealach nuálach” a aimsiú chun an Ghaeilge a chur chun cinn.

“D’aithin muid go raibh bearna sa mhargadh agus deis mhaith ann cainéal Gaeilge a chur ar bun mar go bhfuil an oiread forbartha déanta ar YouTube,” arsa Éadaoin.

Ar an chéad bhlag a foilsíodh ar Tusa Tube, bhí tuairisc ar Lá na Gaeilge i mBéal Feirste anuraidh agus tá físeáin go leor déanta ó shin de na cailíní gealgháireacha seo agus iad i mbun spraoi.

Níorbh fada a gcainéal féin ar an fhód gur tharraing siad aird an chomhlachta léiriúcháin Macalla Teoranta – an dream taobh thiar den mhórscannán Gaeilge Amhrán na Mara a bheas sna pictiúrlanna Dé hAoine seo, 10 Iúil.

Agus b’shin an tús.

Admhaíonn an bheirt acu go mbeidh sé aisteach dóibh filleadh ar an seomra ranga san fhómhar i ndiaidh dóibh “an post samhraidh is fearr dá bhfuil ann” a fháil.

“Ba bhreá linn a bheith ag obair le TG4 amach anseo agus ár seó féin a bheith againn dírithe ar cheol agus ar dhaoine ar chomhaois linn,” a mhínigh Caoimhe.

Is féidir súil a choinneáil ar a bhfuil ar siúl ag Éadaoin agus Caoimhe agus iad ag tuairisciú ar imeachtaí Gaelacha agus i mbun spraoi ar a gcainéal Tusa Tube le linn na bliana.

Agus ná déan dearmad go mbeidh WAC le feiceáil ar TG4 san fhómhar.