Ní cathair mar a tuairisc ‘Ospidéal Ocht Lá’ na Síne

Faoin tráth seo, tá seans maith ann go bhfuil an físeán den ospidéal a tógadh taobh istigh de ocht lá in 武汉 [Wuhan] na Síne feicthe agat. Deich lá an sprioc a bhí acu le hospidéal Huoshenshan a thógáil, ach d’éirigh leo dhá lá a spáráil. 1,000 leaba atá san ospidéal is cosúil, agus cheana féin, is cosúil nach bhfuil dóthain áiteanna ann do na cásanna nua tinnis atá ag teacht chun cinn.

Cuir é sin i gcomparáid leis an gcostas agus an mhoilleadóireacht anseo maidir leis an ospidéal nua leanaí atá á thógáil i lár Bhaile Átha Cliath. Arís eile, chuala muid coicís ó shin go raibh tuilleadh moille orthu, agus go bhfuil níos mó imní fós faoin gcostas. In 2017, €987m an costas a dúradh linn a bheadh orainn, ag deireadh 2018, d’ardaigh sé sin go dtí €1.4b, agus anois meastar go gcaithfear €1.7b.

Tá sé an-éasca a rá gur cheart go mbeadh muid níos cosúla le húdaráis na Síne agus muid ag tabhairt faoi ospidéil. Níl dóthain spáis againn, agus tá na foirgintí nua ag tógáil i bhfad ró-fhada agus muid ag iarraidh iad a thabhairt chun críche. 

Idir an dá linn, tá daoine atá go dona tinn ag fanacht ar chóir leighis agus ar leapacha. Nó tosaítear ag síonaíl gur cheart go mbronnfaí teideal an Taoisigh ar Michael O’Leary Ryanair, mar gheall ar an mbealach éifeachtach atá sé in ann gnó a dhéanamh. Ach breathnaigh arís ar an tSín. Tá ospidéal nua agus galánta acu, ach níl an tsaoirse chéanna acu.

Tá an dochtúir a thriail a insint do na húdaráis in Wuhan faoin víreas seo, 李文亮 [Li Wenilang] anois básaithe. Tuigtear gur tholg sé an víreas agus é ag obair san ospidéal. Thug sé foláireamh do lucht cúraim sláinte ag deireadh na bliana seo caite, ach póilíní a tháinig chuige ag rá leis a bhéal a choinneáil dúnta agus a chuid bréag a choinneáil ina bholg. 

Gabhadh leithscéal leis píosa ó shin, ach cén mhaith dó anois é? Níl aon chead ag na meáin shóisialta feidhmiú sa tSín mar atá siad anseo againne, agus cé go raibh caint ar líne faoin gcás, ba léir gur ghlan rialtas na Síne go leor.

Ina measc, bhí haischlibeanna ag iarraidh cead cainte agus ag iarraidh go ngabhfadh an rialtas a leithscéal leis an dochtúir. An freagra a bhí acu sa tSín ar cheist éigeandála sláinte ná ciapadh a dhéanamh ar dhochtúir, agus ansin scéal mór a dhéanamh as ospidéal nua nuair a bhí rudaí gaibhte ó smacht.

Ó shin, tá an víreas anois tolgtha ag os cionn 31,000 duine sa tSín agus beagnach 700 maraithe aige. 

Nílim ag rá go bhfuil muid foirfe sa tír seo, ach ar a laghad tá córas againn a cheadaíonn imscrúdú agus cáineadh.