An bhfuil mianach an Iron Meáin ionat?

Beidh Inis Iron Meáin ar siúl den 17ú huair i gceann coicíse ar an oileán Gaeltachta amach ó chósta na Gaillimhe. Beidh trí rás — 5km, 10km agus 12km — ar siúl in Inis Meáin ar an 14 Márta 2020 ag 12.30 agus beidh an láithreoir aitheanta Hector Ó hEochagáin ina aoi speisialta ag ócáid na bliana seo. 

Chaith Hector bliain ina chónaí in Inis Meáin sular chuir sé tús lena ghairm mar láithreoir teilifíse agus raidió agus deir sé go raibh an-tionchar ag an oileán air. Dúirt sé go bhfuil sé ag súl go mór le filleadh ar an “oileán speisialta” don chéad uair ó d’fhág sé níos mó ná 30 bliain ó shin é. 

Dúirt eagraí an rása, Máiréad Ní Fhátharta, go bhfuil muintir an oileáin “ag tnúth go mór” leis an rása mór. 

“Tá muid ag tnúth go mór le ‘Inis Iron Meáin’ mar a bhíonn chuile bhliain. Bíonn lá den scoth ann i gcónaí. Is bliain thar a bheith speisialta í mar gheall ar Gaillimh2020 agus mar gheall ar aoi speisialta na bliana seo — Hector Ó hEochagáin. Nuair a bhí mé i mo ghasúr, ag fás aníos ar Inis Meáin, is cuimhin liom Hector ina chónaí ar an oileán. Tháinig sé féin agus cúpla leaid eile ón mórthír ar bhriseadh bliana chuig an oileán, tráth ar mhair siad mar oileánaigh agus iad ag foghlaim na Gaeilge,” a dúirt sí. 

Tá Máiréad ina príomhoide ar Choláiste Naomh Eoin, meánscoil Inis Meáin, atá ar cheann de na scoileanna beaga “is rathúla in Éirinn”. Téann an t-airgead a bhailítear ó tháillí clárúcháin an rása i dtreo na scoile agus glacann go leor de dhaltaí agus múinteoirí na scoile páirt sa rás féin. Deir Máiréad go bhfuil an rás an-tábhachtach do phobal an oileáin agus go háirithe don mheánscoil.

Is “cúrsa eisceachtúil ardscéimhe” atá i gceist le Inis Iron Meáin agus an rogha ag iomaitheoirí 5km, 10km nó 12km a rith. Tá an cúrsa “éasca” agus an cúrsa “crua” (5/10km) uilig ar bhóithre an oileáin, ach beidh ar an té a roghnóidh an cúrsa “fíorchrua” (12km) dul i ngleic leis an trá Ceann Gainimh. 

Tá lascainí ar fáil do mhuintir an oileáin — is é sin duine ar as an oileán é, atá ina chónaí san oileán nó atá pósta le hoileánach — agus beidh lascainí ar fáil ar sheirbhísí farantóireachta ó Ros an Mhíl do dhaoine as baile isteach a chuireann ticéad in áirithe roimh thús na míosa seo chugainn. Tá tuilleadh eolais faoi na lascainí seo ar shuíomh Inis Iron Meáin. 

Bronnfar mála féiríní ar gach iomaitheoir, ina bhfaighfear éadaí cniotáilte ó Chniotáil Inis Meáin Teoranta, t-léine an rása agus “nithe deasa eile”. 

Is féidir clárú don rás anseo