Amárach, an Aoine, an 16 Meán Fómhair, beidh stáitsí móra agus cúinní beaga na tíre beo le himeachtaí Oíche Chultúir.
Idir dhrámaí, taispeántais, ceardlanna, ceolchoirmeacha agus eile, tá breis agus 1400 imeacht sa chlár i mbliana agus scoth na n-imeachtaí Gaeilge ina measc!
Tochail isteach sa chlár lena fháil amach cad é atá ag tarlú i do cheantar féin.
1) OÍCHE EALAÍON: ‘Ealaíona sa Lab’ / An Lab, Daingean Uí Chúis, Ciarraí, 7in.
Beidh meascán de cheol, filíocht agus rince ar siúl le healaíontóirí na háite, ina measc Simon Ó Faoláin, Maria Svenson (damhsóir cónaithe nua an Lab), Louise Nic an tSionnaigh agus Áine Moynihan.
Beidh tionscnamh ealaíne le hÁine Ní Chíobháin, ‘Bálua’, ar taispeáint; díríonn sé ar an ngealas sa doircheacht.
Taispeántas sceitseála, eitseála agus colláise atá ann. Bhí an-tóir ar thaispeántas Áine ar Inis Oírr le gairid agus is deis iontach é seo chun spléachadh a fháil ar shaothar eile léi.
Anuas air sin, beidh ealaín Dervla O’Flaherty le feiceáil, í bunaithe ar a tréimhse i mbun fánaíochta san Ind, san Ungáir agus san Íoslainn.
Tá spéis aici sa dóigh a spreagann áiteanna nua an tsamhlaíocht agus sna slite ina ndéantar léarscáileanna.
2) EALAÍN BHÉIL: ‘Béal Úr’ / Leabharlann Phobail Ghaoth Dobhair agus An Chrannóg, na Doirí Beaga, Gaoth Dobhair, Tír Chonaill, 6in agus 8in.
Tiocfaidh filí, drámadóirí agus scríbhneoirí le chéile sa Chrannóg i nGaoth Dobhair le meascán de ghearrdhrámaí, agallaimh bheirte, dánta agus lúibíní a chur i láthair.
I measc na n-ealaíontóirí beidh Máire Wren, Eoghan Mac Giolla Bhríde, Áine Ní Bhreisleáin agus Seán Ó Maolagáin. Sólaistí ar fáil.
* Roimhe sin ar 6in i Leabharlann Phobail Ghaoth Dobhair, déanfar ceiliúradh ar oidhreacht na Gaeltachta le léacht staire le hUinseann Ó Breisleáin.
Díreofar ar an gceangal idir Muintir Ghabhla agus an Asgard agus leanfar le ceol le ceoltóirí óga na Crannóige.
3) SCÉALAÍOCHT AGUS CEOL: ‘Oíche leis na Cleamairí‘ / Red Ned’s Bar, 27 Sráid Ogle, Ard Mhacha, 5-7in agus Ceolchoirm le ‘Emma Ní Fhíoruisce agus JJ Ó Dochartaigh‘.
Fadó bhíodh cleamairí i mbeagnach gach paróiste, iad gléasta i bhfeisteas tuí, le hamhráin ina mbéil agus uirlisí ina nglac acu.
Bígí cinnte go mbeidh scoth na hoíche scéalaíochta, amhránaíochta agus ceoil ar siúl i dteannta na gCleamairí agus iad ar ais i mbun scléipe.
Lena chois sin, beidh beirt réaltaí óga ceoil, Emma Ní Fhíoruisce ó Ghaeltacht Dhún na nGall, agus JJ Ó Dochartaigh as Doire, ar an stáitse i dTeach De Averell ar Shráid Uachtair na nGall an oíche chéanna ag 6.30in.
4) CEOL: ‘Tograí IMRAM’/Coláiste Mhuire Gan Smál, Luimneach, 5.30in – 6.30in.
Más maith leat amhráin mhóra lena leithéidí David Bowie, Van Morrison agus Leonard Cohen a chloisteáil i dteanga bhinn na nGael, tugaigí bhur n-aghaidh ar Luimneach d’oíche mhór IMRAM.
Tá cáil mhór ar imeachtaí IMRAM agus ar an Brad Pitt Light Orchestra, a bheas i mbun ceoil ar an oíche.
Beidh seisiún ‘Ceol sa Chistin’ ar siúl freisin i gcathair Luimnigh, i gConradh na Gaeilge ar Shráid Thomáis.
5) SIAMSAÍOCHT: Oíche Ghaelach sa Chreagán / An Creagán, an Ómaigh, 7in.
Beidh ceiliúradh á dhéanamh sa Chreagán ar an Ómaigh ar chultúr saibhir an cheantair, agus tá imeachtaí beartaithe a rachaidh i bhfeidhm ar óg agus ar aosta.
Cuirfear tús le himeachtaí na tráthnóna ag 7in le cluichí agus imeachtaí ealaíne do pháistí bunscoile.
Beidh ceol, damhsa agus scéalaíocht ar siúl ó 8.30in ar aghaidh.
Ar an mbaile céanna, in Ionad Ealaíon na Sruthaile ó 5 -11in, beidh taispeántas damhsa ar an sean-nós á reáchtáil ag teagascóirí agus damhsóirí na háite.
Beidh grúpa amhránaíochta ag casadh chomh maith agus tá fáilte roimh an uile dhuine a bheith páirteach ann.
Baile Átha Cliath, Béal Feirste, Gaillimh, Corcaigh… is cuma cén áit a bhfuil tú mar go mbeidh imeachtaí Gaeilge ar siúl i ngach cearn den tír amárach. Tabhair súil ar na hócáidí go léir anseo.
