5 Imeacht Ghaelacha
ar siúl as seo go ceann tamaill!

1) LÉIRIÚ ILMHEÁIN: Aisling? / Ros Muc, Dé Sathairn 26 & Dé Domhnaigh 27 Samhain 2016

aisling-mor

Is léiriú amharclannaíochta sonrach é Aisling? ina ndéantar scéal casta réigiúin Ghaeltachta na hÉireann ó 1916 i leith a chíoradh.

Tá Máiréad Ní Mhaonaigh, Pól Ó Ceannabháin, Méabh Ní Bheaglaoich, Johnny Óg Connolly, Breandán de Gallaí agus lear mór réaltaí eile ó Ghaeltachtaí ar fud na tíre tagtha le chéile, faoi stiúir Dharach Mhic Con Iomaire, le ceiliúradh a dhéanamh ar fhís cheannairí 1916.

Beidh an chéad léiriú i Ros Muc an deireadh seachtaine seo agus ansin tabharfar aghaidh ar Éigse Dhiarmuidín i nGaeltacht Chorcaí an tseachtain seo chugainn.

Tuilleadh eolais agus dátaí ar fáil anseo.


2) CAMCHUAIRT: / Ionad Cultúrtha Baile Bhuirne, Co. Chorcaí, Dé hAoine 25 Samhain agus Halla na Feothanaí, An Daingean, Co. Chiarraí, De Sathairn 26 Samhain ag 8in

reliam

Tá an sárghrúpa seo ar camchuairt i gCúige Mumhan thar an deireadh seachtaine, ag tosú i nDún Garbháin anocht.

Is iad Liam Ó Maonlaí (amhránaí agus ceoltóir ildánach), Cormac Ó Beaglaoich (consairtín), Eithne Ní Chatháin (fidil agus guth), Maitiú Ó Caiside (píb uilleann) agus Peter O’Toole (olldord) atá sa ghrúpa Ré.

Bíonn draíocht le brath aon uair a dtagann an cúigear le chéile agus iomrá mór ar a gcuid ceolchoirmeacha beo dá bharr sin!

Má tá tú ag iarraidh dul chuig ceolchoirm an Daingin cuir ríomhphost chuig receol5@gmail.com nó seol téacs chuig 087 6462135

Don Ionad Cultúrtha i mBaile Bhuirne, téigh i dteagmháil le eolas@ionadculturtha.ie nó glaoigh ar 026 45733


3) OÍCHE CHLUB: 110th Street / Blue Note, Sráid Liam Thoir, Gaillimh, Dé Sathairn 26 Samhain, ó 10in

cian

‘An rud is annamh is iontach,’ a deir muid agus, anois go bhfuil bliain caite ó reáchtáladh 110th Street go deireanach, tá sé cinnte i measc na rudaí annamha iontacha ar domhan!

Tá cóisir mhór beartaithe in iarthar na tíre i dteannta Chian Uí Chíobháin, láithreoir An Taobh Tuathail ar RnaG, agus Cyril Brisco chun ceiliúradh a dhéanamh ar 18 bliain ó cuireadh tús leis an oíche chlub rathúil.

Grá don cheol, don saol club agus don chairdeas a cothaíodh ar an tslí is cúis le hinmharthanacht 110th Street.

Mar réamhtheachtaí ar an chóisir, tá seinnliosta iontach curtha le chéile acu a ghríosódh an duine ba shocra agus ba shuaimhní chun damhsa!

Breithlá Sona ó NÓS, go maire sibh an chéad!


4) FÉILE: Fleadh Feirste / An Chultúrlann agus ionaid eile sa Cheathrú Ghaeltachta, Béal Feirste, 30 Samhain – 4 Nollaig

jonieile

Cuirfear tús le Fleadh Feirste, ceann de mhórfhéilte Gaelacha na cathrach, Déardaoin seo chugainn agus leanfar le scoth na n-imeachtaí thar an deireadh seachtaine.

Beidh cuid mhaith de na himeachtaí ag titim amach ón Aoine ach tá dhá imeacht ar fiú go mór a lua ar siúl Déardaoin.

Tabharfaidh Ceardlann Coimicí Gael le hAodán Ó Curnáin bunús maith don té a bhfuil spéis acu i ngreannáin agus i ngrafaicí ag 11rn.

Gealltar oíche den scoth ag oíche Imram ‘Ide na Tine’ an oíche chéanna, ó 8.30in, tráth a dhéanfar ceiliúradh ar amhráin mhóra Joni Mitchell, i nGaeilge!

Beidh níos mó againn ó Fhleadh Feirste ar an tseachtain seo chugainn!


5) FÉILE CHEOIL: Éigse Dhiarmuid Uí Shuilleabháin / Sa Mhuileann agus in ionaid éagsúla i gCúil Aodha, Corcaigh, 1 – 4 Nollaig

muireann

Déardaoin seo chugainn a chuirfear tús leis an fhéile cheoil agus amhránaíochta bhliantúil i gCúil Aodha a dhéanann ceiliúradh ar laoch mór an cheantair, Diarmaid Ó Suilleabháin.

Idir cheardlanna, cheolchoirmeacha, thaispeántais agus léirithe, tá scoth an chláir curtha le chéile arís i mbliana.

I rith an lae Déardaoin agus Dé hAoine beidh comhdháil á reáchtáil i gcuimhne ar Sheán Ó Ríordáin faoin teideal ‘Smaointeoireacht an Ríordánaigh’.

I measc na mbuaicphointí eile, tá Aisling? (féach thuas) agus Ceolchoirm na hÉigse, a thabharfaidh Muireann Nic Amhlaidh, Ailean Domhnallach, Kathleen McInnes agus Sineag McIntire as Albain agus Peadar Ó Riada le Cór Chúil Aodha ar stáitse le chéile.

Bíodh scoth an deireadh seachtaine agaibh go léir!