5 Imeacht Ghaelacha
ar siúl as seo go ceann tamaill!



1.) Pop Up Gaeltacht/ The Dirty Onion, Béal Feirste, Dé hAoine 3 Márta @ 7.30in.

Tá borradh thar cuimse faoi nós na bPop Ups timpeall na tíre!

Is i mBéal Feirste, in ionad an Dirty Onion, a bhaileoidh na Gaeil le chéile Dé hAoine seo. Comhluadar agus spraoi trí mheán na Gaeilge.

Ná déan dearúd go mbeidh an Pop Up ar siúl i gCeantar an Dáma i mBaile Átha Cliath ar an 16 Márta chomh maith, mar chuid d’imeachtaí na Féile Pádraig.


2) FÉILE: Scoil Gheimhridh Chumann Merriman 2017Campus Phádraig, Ollscoil Chathair Bhaile Átha Cliath 3-5ú Márta.

Léachtaí, seoltaí leabhar, turas stairiúil agus ócáidí liteartha atá geallta ag Scoil Gheimhridh Chumann Merriman na bliana seo a bheidh ar bun ag an deireadh seachtaine.

Tarraingíodh mo shúil chuig siompóisiam amháin atá ar chlár na n-imeachtaí, dar teideal Cothú Phobal na Gaeilge i mBaile Átha Cliath.

Maidin Shathairn a chíorfar an t-ábhar cainte sin, le triúr atá bainteach go dlúth le saol na Gaeilge san Ardchathair: Cathaoirleach Bhord Bainistíochta Scoil Lorcáin, Muireann Ní Mhóráin; Edel “álainn” Ní Bhraonáin, Ciarraíoch atá ar dhuine de bhunaitheoirí Na Gaeil Óga CLG; agus léiritheoir sraithe an chláir Cormac ag a Cúig ar RTÉ Raidió na Gaeltachta, Fachtna Ó Drisceoil.

Seolfaidh an Dr Liam Ó Dochartaigh úrscéal nua le Brian Ó Tiomáin, An Strainséir, agus is faoi a bheidh an cúram leabhar úr Sheáin Uí Éanacháin, ‘An Ghaeilge i Má Nuad’ a sheoladh chomh maith.

Is iad Cló Iar-Chonnacht a d’fhoilsigh an dá shaothar seo. Beidh ceol le clos le linn an deireadh seachtaine ó leithéidí Des Geraghty, an Dr. Síle Denvir agus Peter Browne, a bheidh i láthair d’ócáid cheoil agus plé.

Mar aon leis sin ar fad, cloisfear blaiseadh de shaothar próis agus filíochta bheirt scríbhneoirí ó Bhaile Átha Cliath, Anna Heussaff agus Marcus Mac Conghail, le linn cainte faoi chathaoirleacht Mháire Ní Neachtain.

Tá scata eile ar chlár leathan an deireadh seachtaine a eagraíonn an t-eagras cultúrtha Éireannach, Cumann Merriman, féach merriman.ie le tuilleadh eolais a fháil.


3) SEÓ RINCE: Lïnger, le hÉriú,/Amharclann an Smock Alley, Baile Átha Cliath 6-8 Márta.

Beidh Breandán de Gallaí agus a leathbhádóir rince Nick O’Connell ag tabhairt faoi chamchuairt timpeall na tíre lena seó dar teideal Lïnger, i rith mhí an Mhárta.

Seó comhaimseartha rince atá i gceist leis an saothar seo, a dhéanann iniúchadh ar nithe faoi leith a bhaineann le cúrsaí an tsaoil: faoi bheith ag dul in aois mar shampla amháin; féiniúlacht agus cúrsaí gnéasachta mar shamplaí eile.

Breandán é féin an stiúrthóir agus ba é a dhein cóiréagrafaíocht ar na gluaiseachtaí chomh maith.

D’éirigh go seoigh leis an léiriú seo ag an bhféile Fringe a bhí ar bun i nDún Éideann na hAlban anuraidh.

Ní haon iontas, más ea, go mbeidh siad ag filleadh ar Éirinn ar feadh ceithre seachtaine.

Éist le Breandán de Gallaí faoi agallamh ag Cearbhall Ó Síocháin ar an gclár An Cheárta, ar RTÉ Raidió na Gaeltachta Dé Domhnaigh @ 13:15.

(Beidh an seó á thabhairt timpeall na tíre ina dhiaidh sin – Doire, Gaillimh, Trá Lí, Leitir Ceanainn, Dún Laoghaire, Inis, Béal Feirste)


4) SEOLADH: ‘An Billiúnaí Beag’, le David Walliams (aistrithe ag Máirín Ní Mhárta)/Eason, Sráid Uí Chonaill,  Dé Máirt 7ú Márta @11rn

Beidh ócáid álainn ar siúl do dhaoine óga maidin Dé Máirt seo chugainn i mBaile Átha Cliath.

Is mar chuid d’imeachtaí Sheachtain na Gaeilge a bheidh an ócáid speisialta seo ar siúl agus súil acu go mbeidh aíonna speisialta ó Ghaelscoil Bhrian Bóroimhe i láthair, mar aon le lucht a fhoilsithe agus léitheoirí óga a mbeidh fáilte Uí Cheallaigh rompu.

Seo an 7ú leabhar atá aistrithe ag Máirín do Futa Fata le tamall de bhlianta anuas.

Níor foilsíodh Billionaire Boy, faoi scéal Joe Spud/Práta(!), i mBéarla ach sa bhliain 2010 agus ó shin tá fáil air i dtuairim is 46 teanga eile agus anois as Gaeilge! Treise leo!


5) Lá Idirnáisiúnta na mBan/Teach an Ardmhéara, Dé Céadaoin 8 Márta ag 7in. 

Déanaigí ceiliúradh ar Lá Idirnáisiúnta na mBan i gcomhluadar breá i dTeach an Ardmhéara ar an gCéadaoin seo chugainn.

Beidh na scríbhneoirí Biddy Jenkinson, Ciara Ní É, Lisa Nic an Bhreithimh agus Katie McGreal i measc eile i láthair agus iad ag léamh óna stór de shaothar – idir fhilíocht agus phrós.

Áine Ní Ghlinn a bheidh mar bhean an tí ag an ócáid seo atá eagraithe ag an spéirbhean, Réaltán Ní Leannáin.

Níl cosc ar na fir, Fionn Ó hAlmhain agus Hajime Takahashi a bheidh i mbun ceoil.

Tá imeacht iontach á reáchtáil i gClub Áras na nGael i nGaillimh ar an oíche chéanna.