Beidh muid buíoch go deo as fear na seamróige, Naomh Pádraig, as nathracha nimhe a ruaigeadh as an tír. Buíoch ach amhrasach go ndearna sé a leithéid riamh.
Agus Lá Fhéile Pádraig á cheiliúradh timpeall na cruinne, chuaigh muid i mbun comhairle leis an Dr. Dáibhí Ó Cróinín, Ollamh le Stair in Ollscoil na hÉireann, Gaillimh, agus saineolaí ar Phádraig, le fáil amach faoi na miotais is mó a bhaineann le hÉarlamh na hÉireann!
1) Nathracha Nimhe
Cuirtear ina leith gur éirigh le Pádraig nathracha nimhe a dhíbirt as an tír, míorúilt a tharla tar éis dó 40 lá a chaitheamh ag troscadh, deirtear.
Ach níl tásc ná tuairisc ar nathracha nimhe in Éirinn tar éis na bliana 10,000 RC.
Is cinnte nach rabhadar ann faoin am a raibh Pádraig ar an bhfód anseo againn.
2) Seamróg
Thar aon rud eile b’fhéidir, aithnítear an tseamróg bheag ghlas mar shuaitheantas d’Éirinn ar fud na cruinne.
Creidtear go forleathan gur úsáid Pádraig seamróga chun an Tríonóid a chur in iúl agus an Chríostaíocht a mhíniú do mhuintir na hÉireann.
Más fíor, níl aon tagairt de sna scríbhinní a tháinig anuas chugainn.
3) Teacht go hÉirinn
Measann an saol mór, muintir na hÉireann go háirithe, gur tháinig Pádraig chun na hÉireann sa bhliain 432 agus gur cailleadh é 461.
Níl aon fhianaise in aon chor a chruthódh ceachtar den dá dháta sin.
Cé go bhfuil scríbhinní a tháinig anuas chugainn, a nglactar leo gurb é Pádraig s’againne a cheap iad, níl aon dáta ó thús deireadh luaite iontu.
Mar sin, ní féidir a rá go cinnte cén bhliain a tháinig Pádraig go hÉirinn.
4) Trí bhás Phádraig
Deirtear gurb é an 17 Márta an lá ar cailleadh Pádraig.
Ach ní fios d’éinne cén uair ar cailleadh é go cinnte.
Tá bás luaite le Naomh Pádraig trí huaire sna hAnnalacha.
Deirtear gur cailleadh é sa bhliain 457, gur cailleadh arís é in 461 agus, ar deireadh, sa bhliain 492.
Is féidir a rá go raibh sé marbh amach is amach faoin am gur cailleadh é in 492.
5) Ard Mhacha
Ó lár na 17ú haoise, bhí feachtas ar siúl ag muintir Ard Mhacha, a bhí ag iarraidh a chur ina luí ar mhuintir na hÉireann i gcoitinne, agus ar an saol mór ina dhiaidh sin, gurb é Pádraig a bhunaigh an eaglais ann.
Scaipeadh an scéal gur in Ard Mhaca a d’aimsigh Pádraig a cheann ceathrú agus b’shin é an fáth a bhfuil Ard Mhacha i gceannas ar eaglais na hÉireann ó shin.
Ach, níl puinn fianaise go raibh Pádraig i ngiorracht scread asail d’Ard Mhacha.
Pé ceangal a bhí ag Ard Mhacha le Pádraig, níl a chruthúnas ar fáil in aon áit.
6) Pádraig V Palladius
Smaoineamh eile atá ag gach éinne ná gurb é Pádraig is túisce a scaip an Chríostaíocht ar mhuintir na hÉireann.
Má ghlactar leis gur tháinig Pádraig sa bhliain 432, tá fianaise a tháinig anuas ón Mhór Roinn, a léiríonn go raibh scaipeadh na Críostaíochta ar siúl ag fear eile in Éirinn sa bhliain roimis sin.
Palladius ab ainm dó, a rugadh agus a tógadh i gceantar thart ar Auzerre na Fraince.
Deirtear go ndearnadh easpag dó agus gur cuireadh go hÉirinn é sa bhliain 431.
Anois, mura gcreideann tú gur tháinig Pádraig sa bhliain 432, d’fhéadfaidh samhlú gur tháinig sé roimh Palladius agus gurb é Pádraig s’againne, a bhí chomh díograiseach sin ag scaipeadh na Críostaíochta, ba cúis le teacht an easpaig Palladius go hÉirinn.
I gcás Phádraig, is gá hata an bhleachtaire a chur orainn agus ár samhlaíocht a mhúscailt chun tuiscint níos fearr a fháil ar scéal a bheatha.
Ceiliúraimis é!
Foilsíodh an t-alt seo ar dtús ar 17 Márta 2016.
