Tá EP nua díreach eisithe ag an bhfile Séamus Barra Ó Súilleabháin, EP ar a bhfuil sé rian de dhánta agus d’amhráin nuachumtha.
Tá cáil nach beag ar Shéamus Barra le cúpla bliain anuas agus é ar dhuine de mhórfhilí na glúine nua filíochta i saol na Gaeilge. Glacann sé páirt rialta san oíche filíochta REIC a bhíonn ar siúl in ionaid éagsúla ar fud na hÉireann, agus dúirt sé dán dá chuid d’Uachtarán na hÉireann ag comóradh 20 bliain TG4 ag ócáid speisialta i nGaillimh dhá bhliain ó shin.
Chuir Séamus Barra a chéad chnuasach filíochta i scríbhinn amach le Cló Iar-Chonnacht cúpla bliain ó shin — Beatha Dhónaill Dhuibh — ach seo an chéad uair don fhile óg cnuasach fuaime a chur amach.
Is féidir éisteacht leis na rianta ar an suíomh Bandcamp.com agus an t-albam iomlán a íoslódáil ar €5 ón suíomh céanna.
Is é Séamus Barra a scríobh na sé rian agus ba é Eóghan Harris a léirigh an EP.
