Sa cholún nua seo ar NÓS, tabharfaidh ár gcolúnaí Ola Majekodunmi spléachadh ar nuacht agus imeachtaí móra an phobail Afra-Éireannaigh.
Albam na Bliana buaite ag Denise Chalia
Fógraíodh Denise Chaila ina buaiteoir don ghradam ‘Albam na Bliana 2020’ ag RTÉ Choice Awards dá halbam Go Bravely, gradam a raibh duais €10,000 luaite leis. Comórtas as an ngnách a bhí i mbliana agus na moltóirí ag teacht le chéile ar Zoom leis an mbuaiteoir a roghnú as deich n-albam a bhí ar an ngearrliosta.
Eisíodh Go Bravely i mí Dheireadh Fómhair seo caite, cúpla mí i ndiaidh don cheoltóir as Luimneach a bheith ar an gclár Other Voices i mí na Bealtaine 2020. Bhí an-rath ar an singil ‘Chalia’ a eisíodh anuraidh freisin, amhrán ina bhfógraíonn an t-amhránaí cén chaoi a sloinne a rá i gceart.
Soulé, Lá Fhéile Phádraig
Mar chuid de Fhéile Lá Fhéile Phádraig 2021, rinne Soulé gach iarracht taispéantas beo pléascadh lán dathanna, soilse, agus damhsa a chur ar siúl ar SPF TV, agus ceol nua nár chualathas cheana á casadh aici.
D’inis sí a scéal pearsanta faoin ngrá agus faoin saol trí stíliú agus damhsa a cuireadh le chéile go sainiúil don ocáid in éineacht le dearadh agus soilsiú den scoth.
Tá Soulé ar cheann de na hamhránaithe óga is úire in Éirinn atá chun tosaigh i saol an cheoil phopleictrigh. Tá an oiread rudaí dochreidte bainte amach ag Soulé lena stíl R&B as na 1990idí. Tá a háit a barr Chairteacha Raidió na hÉireann, sruthaíodh a cuid ceoil 12 mhilliún uair ar Spotify, ainmníodh trí huaire í d’Amhrán na Bliana ag RTÉ Choice Music Prize agus anuas ar an méid sin agus uile tá taispéantais den scoth tugtha uaithi aici ag príomhfhéilte na tíre cosúil leis an bPicnic Leictreach, Body & Soul agus Other Voices. Ar an ardán idirnáisiúnta, bhí sí ar dhuine de na príomhcheoltóirí na Féile Eurosonic in 2017 san Ísiltír agus iarradh uirthí seinm ag Music Week in Los Angeles in 2019 freisin.
Tolu Makay agus FeliSpeaks ar RTÉ Tommy Tiernan Show
Bhuail an fuirseoir agus láithreoir teilifíse Tommy Tiernan leis an bhfile, taibheoir, agus drámadóir, FeliSpeaks, agus leis an amhránaí agss scríbhneoir, Tolü Makay ar an 13 Márta. Labhair siad faoi théamaí difriúla maidir le cúlra, reiligiún, an pobal Afra-Éireannach, rath sna healaíona, an Iarúibis agus an fhéiniúlacht Nigéarach-Éireannach. Léigh FeliSpeaks a dán ‘For Our Mothers’ os ard don lucht féachana freisin.
#TogetherAgainstRacism
Is mí an-tábhachtach í mí an Mhárta don ghluaiseacht frithchiníochais in Éirinn agus ar fud na cruinne mar gheall ar an bhfeachtas idirnáisiúnta leis an gciníochas a chosc agus an éagsúlacht a cheiliúradh.
Is é an 21 Márta Lá Idirnáisiúnta chun Deireadh a chur le Idirdhealú Ciníoch, an lá is tábhachtaí i ngach féilire frithchiníoch. Ba ar an lá sin in 1960 a lámhaigh póilíní na hAfraice Theas 69 duine dubh ag léirsiú síochánta ar son an chomhionannais agus i gcoinne dhlíthe na cinedheighilte in Sharpeville.
Is cuimhneachán an dáta seo ar thionchar díobhálach an chiníochais ar dhaoine aonair agus ar an bpobal uilig, agus léiríonn daoine ar fud na cruinne an lá sin tacaíocht i gcoinne an chiníochais. Gach bliain bíonn ócáid dhifriúil ar an lá chun an frithchiníochais a chur chun cinn.
