Amhrán náisiúnta Mhanann canta i nGaelg do Laa Tinvaal

Inniu Laa Tinvaal (Lá Tinbhil), féile náisiúnta Mhanann, agus táthar á cheiliúradh ar fud an oileáin. Mar chuid den cheiliúradh sin, tháinig grúpa ceoltóirí as an oileán le chéile le linn na dianghlasála le leagan speisialta d’amhrán náisiúnta Mhanann — ‘O Halloo nyn Ghooie’ (‘A Thír ár nDúchais) — a chanadh i Manainnis. 

I measc na gceoltóirí atá le cloisteáil san fhíseán a eisíodh ag an deireadh seachtaine, tá colúnaí Manainnise NÓS féin Isla Callister agus a deirfiú Maeve Callister. Is ceoltóirí aitheanta traidisiúnta iad an bheirt bhan agus tá cáil nach beag orthu i measc mhuintir an oileáin agus i bpobal an cheoil traidisiúnta in Albain. 

Ar na daoine eile atá le cloisteáil tá: Aalin Calgue, Cairistiona DOugherty, muintir Hampton, Christy de Haven, Ruth Keggin Gell, muintir Kilgallon, Breesha Maddrell, Cori Philips, muintir Stitt, agus Chloe Woolley. 

Is fonn traidisiúnta atá i bhfad níos sine ná an t-amhrán náisiúnta féin a ghabhann le ‘O Halloo nyn Ghooie’. ‘Marksleih Mylecharaine’ (Marcshlua Mylecharaine) a thugtaí ar an gceol a scríobhadh os cionn 200 bliain ó shin. Ba é William Henry Gill a scríobh focail an amhráin náisiúnta i mBéarla, agus d’aistrigh an cainteoir Manainnise John J Kneen go Manainnis iad an bhliain a scríobhadh iad — 1907. 

Ghlac an Tinbheal (Dáil Mhanann) leis go hoifigiúil mar amhrán náisiúnta na tíre Gaelaí in 2003. 

Seo thíos na liricí:

O Halloo nyn Ghooie

O chliegeen ny s’bwaaie

Ry gheddyn er ooir aalin Yee; 

Ta dt’Ardstoyll Reill-Thie

Myr Barrool er ny hoie

Dy reayll shin ayns seyrsnys as shee.

Lhig dooin boggoil bee,

Lesh annym as cree,

As croghey er gialdyn yn Chiarn;

Dy vodmayd dagh oor,

Treishteil er e phooar,

Dagh olk ass nyn h’anmeenyn ‘hayrn.