Beidh an ‘Oíche Chultúir is mó riamh sa Ghaeltacht’ ar siúl níos deireanaí an mhí seo agus clár leathan imeachtaí curtha le chéile ag Ealaín na Gaeltachta. Tá os cionn 40 imeacht cláraithe ag muintir na Gaeltachta don oíche mhór a bheidh ar siúl Dé hAoine an 23 Meán Fómhair.
Is iad na ceoltóirí aitheanta as Ráth Chairn Máire agus Étáin Ní Churraoin atá ina n-ambasadóirí Gaeltachta d’Oíche Chultúir 2022 agus beidh oíche mhór cheoil á hóstáil acu ina gceantar dúchais féin in éineacht le haíonna speisialta Gaeltachta eile Séamus agus Caoimhe Uí Fhlatharta ina measc.
Beidh idir cheol, damhsa, scannánaíocht agus litríocht á gceiliúreadh sna himeachtaí a bheidh a reáchtáil i ngach ceantar Gaeltachta “ó Cheann Fhánada go Cléire agus ó Ráth Chairn go hÁrainn”.
Tá méadú mór tagtha ar imeachtaí don Oíche Chultúir in Uíbh Ráthach i mbliana, agus ceolchoirm i gCathair Dónaill, maidhc oscailte i mBaile an Sceilg, ceardlann ealaíne trá sa Ghleann, seoladh físeán ealaíne nua le Róisín Ní Chionnfhaolaidh, teilgean cloigíní cré-umha agus camchuairt chultúrtha a thabharfaidh scéalta áitiúla na hoíche go lucht féachana ar líne.
“Ár mbuíochas le healaíontóirí, léiritheoirí agus eagrais pobail agus pleanála teanga uilig atá ag tógáil an deis splancanna an chultúir a lasadh agus a roinnt le pobal na Gaeltachta agus na tíre ar an Oíche Chultúir i mbliana,” a dúirt Micheál Ó Fearraigh, Feidhmeannach Forbartha Ealaíon Údarás na Gaeltachta.
Beidh séasúr nua den tsraith ealaíon Imeall ag tosú ar TG4 an fómhar seo agus cuirfear tús leis an tsraith le heagrán speisialta d’Oíche Chultúir. Taispeánfar sa chlár uair an chloig blaisíní de na himeachtaí a bheidh ar siúl ar fud na hÉireann ar an oíche mhór – idir chaoladóirí Mhaigh Eo, rapálaithe Chorcaí, agus dhamhsóirí sean-nóis Bhéal Feirste.
Beidh Molscéal, ardán idirlín TG4, ar an láthair freisin agus sraith speisialta á cur le chéile acu i gcomhar le hEalaín na Gaeltachta. Beidh Molscéal ag labhairt le healaíontóirí Gaeltachta ina gceantar dúchais agus iad ag réiteach le haghaidh Oíche Chultúir. Beidh an t-aisteoir as Cois Fharraige Eoin Mac Diarmada i mbun dráma aonair i gCaisleán Mhionlaigh i nGaillimh, beidh an t-amhránaí Lasairfhíona Ní Chonaola as Inis Oírr i mbun ceardlann amhránaíochta, agus beidh teaghlaigh óga Uíbh Ráthaigh ag cruthú píosa mór ealaíne sa leithinis sin. Beidh muintir Ghaeltacht Thír Chonaill gníomhach ar an oíche freisin agus ceoltóirí agsu ealaíontóirí as Gaoth Dobhair agus na Rosa araon i mbun aicsin.
Dún na nGall
Cruthaitheacht agus Ceol (Taispeántas), Amharclann Ghaoth Dobhair. 16.00.
Oíche Airneáil Sheanchas Sheáin Néill, Rann na Feirste. 20.00.
Miotaseolaíocht agus Finscéalta ón Domhan Mhór, an tSean-Bheairic, 16.00.
Meitheal Líníochta, an tSean-Bheairic, 18.00.
Oíche Chultúir sa Ghleann, Halla Mhuire, Gleann Cholm Cille. 16.00
Laochra a Mhúscail (Taispeántas), Leabharlann Phobail Ghaoth Dobhair. 18.00
Ealaín Beo – Is Linne í, an Clochán Liath. 16.00.
Oíche Airneáil le Coiste Cairde Bhun an Inbhir, Bun an Inbhir. 20.00.
Ceol sa Chaifé le Brí Carr, Amharclann Ghaoth Dobhair. 20.00
Sceitse Sciobtha, Tigh Choll, an Fál Carrach. 18.00
Maigh Eo
Gaillimh
Cruinniú Ceoil Idir Ghlúine, oifigí Mhuintearais, Tír an Fhia, Leitir Móir. 19.30
Ceol, Amhránaíocht, agus Damhsa, Tigh Phlunkett, Leitir Móir. 21.30
Bidín le Cumann Drámaíochta Chorr na Móna, Áras Pobail Chorr na Móna, 20.00
Turas Siúil ar Mhionlach agus Oíche Airneáin, Scoil Bhride, Mionlach, 18.30
Cúirt Cheoil na mBan, Áras Éanna, Inis Oírr, Oileáin Árann. 17.00, 19.30, 21.00.
Ceardlann Amhránaíochta Sean-Nóis, Seanscoil Sailearna, Indreabhán. 15.30, 16.30.
Béaloideas Mhaigh Cuilinn, Teach na Gaeilge, Maigh Cuilinn, 19.00.
‘Ag Ardú Seolta’ (Seoladh Dlúthdhiosca), Scoil Chuimsitheach Chiaráin, an Cheathrú Rua. 19.00.
Aistear Físiúil trí Chonamara Láir, Ionad Theach an Phiarsaigh, Ros Muc. 18.30
Ciarraí
M’Fhocail, M’Ealaín, Bá Fhionáin, Uíbh Ráthach. 18.00
Órlasta (Scannán), Halla Chathair Dónaill, Uíbh Ráthach. 19.30
Droichead Cultúrtha (Ceolchoirm), Cathair Dónaill, Uíbh Ráthach. 19.30
Oíche Mic Oscailte Uíbh Ráthaigh, Halla Pobal Bhaile an Sceilg. 20.00
Abair leis na Crainn É, An Díseart, an Daingean. 16.00
Drámaíocht Faoin Aer, An Díseart, an Daingean. 17.00
Naked Animals (Ceolchoirm), An Díseart, an Daingean. 20.00
Taispeántas na nDreoilíní, Sráid Eoin, an Daingean. 18.00
Radharc Uíbh Ráthaigh, Uíbh Ráthach, 16.00.
Corcaigh
Nóta Stóta (Gearrscannáin agus Ceol), Ionad Cultúrtha an Dochtúir Ó Loingsigh, Baile Bhuirne. 17.00
Dáil Mhúscraí, Ionad Lae Bhaile Bhuirne. 14.00
Cró (Taispeántas), Cléire. 21.00
Turas Ghobnatan, Séipéal Ghobnatan, Baile Bhuirne, 18.00
Port Láirge
Scéalta ó Ghaeltacht na nDéise, an Rinn. 17.00
An Mhí
Ceardlann Damhsa Céilí, Halla Ghib, Baile Ghib. 18.30
Ceardlann Caoladóireachta, An Bradán Feasa, Ráth Chairn. 19.30
Siúlóid Staire i Ráth Chairn, Séipéal Ráth Chairn. 18.15
Bláth na hÓige – Ceolchoirm, An Bradán Feasa, Ráth Chairn. 21.30
