Chuaigh mé le breathnú ar Before Monsters Were Made aréir sa Project Arts Centre, Barra an Teampaill.
Nuair a chuala gurbh é Ross Dungan a scríobh, fear a chuir an tseoid The Life and Sort of Death of Eric Argyle inár láthair cheana, ní raibh aon cheist ach go ndéanfainn gach iarracht freastal air.
Éinne a chonaic sárléiriú Eric Argyle cuimhneoidh siad ar dhráma ríshuimiúil a raibh rian an scéalaí go trom air, léiriú aduain aisteach ar shaol fir a chuaigh siar is aniar.
Scéinséir de dhráma a bhfuil léasanna dóchais is grinn breac tríd é Before Monsters Were Made.
Tarraingeoidh Peter Coonan (Love/Hate) go leor daoine chuige cinnte agus tá slua mór tuillte agus ag teastáil ó dhrámaí mar seo.
Tá seit iontach ann, ar gá siúl thairis le dul isteach i do shuíocháin ar dtús, seantroscáin spréite agus urlár déanta as cláir adhmaid.
Cruthaítear teach agus an áit taobh amuigh i mbealach an-simplí éifeachtúil.
Baintear an-úsáid as solas le seomraí, tithe agus amanna éagsúla a léiriú.
Léiríonn an dráma féin tábhacht scéalta agus ráflaí, cúlchaint agus mar a athraíonn scéal ó dhuine go duine is ó insint go hinsint.
Mar sin leis an dráma féin mar is cinnte go mbeidh a léamh féin ag go leor agus é faoi lán seoil.
Téitear ón leathfhíric a chaitear amach romhat sula sciobtar uait é, go leathmhíniú iontaofa nach féidir muinín a bheith agat as.
Tá lonnaithe i leagan samhailteach de Bhéal an Átha, áit éigin le stíl ‘kitschúil’ na seascaidí roimh theacht na bhfón póca.
Ról ag an gceol pianó féin ann agus é ag damhsa leis an dorchadas agus leis na scáileanna.
Bainfidh sé léim asat chomh maith.
Tumann tú go grinneall agus taoscann leis na harrachtaigh agus mórphéisteanna sin atá greamaithe go domhain doráite inár sochaí.
Is mór dom a rá go bhfuil an reacaireacht go seoigh ar fad.
Luíonn tú i mbos láimhe ag an drámadóir, é ag spraoi leat agus tú ar tinneall ag súil leis an gcéad chanta eile den scéal a chlos.
Is mór an gar é Manus Halligan a thugann go leor faoisimh don slua agus an dráma ag treabhadh leis trí thonnta tromchúiseacha, shamhlófá leathbhaol scigphictiúr de Dougal Father Ted ach éiríonn leis an dráma sin a scaipeadh ar fad, leis.
Baintear úsáid sáréifeachtach as spléachadh chun tosaigh measctha leis an am i láthair, dhá radharc buailte anuas ar a chéile ag tarlú ag an am céanna, na carachtair idir dhá stól agus idir dhá dhomhan.
Tá sé dochreidte ar fad, rud nach bhfeicfidh tú i scannán a riamh mar nach féidir a dhéanamh ar an scáileán.
Cailltear beagán de theaspach an chéad leatha sa deireadh is dócha.
Is féidir go bhfuil ró-rian de deus ex machina anseo nó ansiúd agus is ró-mhacalla a bhaintear as buanchruthanna áirithe ach scéal é a shúnn agus a choinníonn aird go deireadh báire.
Téigh ann mar gur cinnte go dtaitneoidh sé leat… mura dtaitníonn chuile sheans nach n-oireann drámaí duit!
Ar siúl anois sa Project Arts Centre, BÁC, go 16 Bealtaine, 8.00in. Ticéid €18/16
Foireann: Janice Byrne, Peter Coonan, Lorcan Cranitch, Orla Fitzgerald, Manus Halligan, Zena Donnelly agus Ava McKevitt.
Scríofa ag Ross Dungan. Stiúrtha ag Ben Kidd.
