In amanna bíonn ár dteanga nasctha le ceisteanna dáiríre i measc an mhórphobail anseo in Éirinn ach ní bheidh aon rian de sin le feiceáil in Amharclann Smock Alley amárach agus Dé hAoine.
Dráma úrnua é Smidiríní a phléann le gnéithe éagsúla de shaol na Gaeilge agus a chuireann i láthair iad tríd an ghreann agus an spraoi.
“Bhí sé de sprioc agam agus mé ag tabhairt faoin dráma seo ná go gcuirfí béim ar an taobh greannmhar, taitneamhach agus soiléir den teanga,” arsa Hilary Bowen-Walsh, stiúrthóir Smidiríní.
“Tá scannal ann, spraoi, grá, eagla agus dúnmharú fiú… meascán mearaí a bhfuil siamsa ag croílár an aicsin.”
Tá an dráma a léiriú mar chuid den fhéile Collaborations a thugann deiseanna do dhrámadóirí agus d’aisteoirí dúshlán úr a chur rompu agus saothar a fhorbairt as an nua.
“Tá níos mó taithí agam mar aisteoir ach tá roinnt drámaí stiúrtha agam le blianta beaga anuas agus is breá liom bheith ag stiúradh,” arsa Hilary, bean ildánach a bhíonn ar ardán GaelGÁIRÍ ó am go chéile chomh maith.
“Chuir muid cliar den scoth le chéile agus bhí sé an-sultmhar an dráma a chruthú.
“Tobchumadóireacht a bhí ann den chuid is mó, rud a chuireann go mór leis an bheocht ar ardán, agus tá súil againn go mbainfidh an lucht féachana an oiread taitnimh as agus a bhain muid féin go dtí seo!”
Léiriú de chuid M’Umbro Top é Smidiríní a thosaíonn ar 6.30in Déardaoin 26 agus Dé hAoine 27 Feabhra / Smock Alley Theatre, Sráid an Mhalartáin Íochtarach, BÁC.
Tá blaiseadh den dráma le feiceáil anseo agus ticéid ar fáil anseo.
