Tá scata Éireann imeachtaí ar bun an tseachtain seo chugainn, táim chun iarracht a dhéanamh an méid is mó is féidir liom a chur san áireamh san alt seo inniu….!
Comhdháil lae ar shaothar an Chadhnaigh, ar líne, Dé hAoine 20 Samhain óna 9:00
Beidh comhdháil lae faoi shaothar Mháirtín Uí Chadhain ar bun ag lucht Choláiste na Tríonóide an tseachtain seo chugainn. Mar is eol do chuid mhaith agaibh, cailleadh an t-údar leathchéad bliain ó shin agus imeachtaí go leor eagraithe le déanaí chun é a chomóradh. I measc na rannpháirtithe a bheidh ag labhairt faoi ghnéithe éagsúla dá chuid scríbhneoireachta, beidh Máirín Nic Eoin, Caitlín Nic Íomhair, Alan Titley agus Ian Ó Caoimh. Níl aon chostas ar na ticéid ach bí cinnte tú féin a chlárú ag an nasc seo.
Féile Litríochta Chorca Dhuibhne, ar líne, ón 20 Samhain ar aghaidh
Tá Féile Litríochta Chorca Dhuibhne thar n-ais arís don dara bliain, bail ar an lucht eagraithe! Cuirfear tús go fíorúil leis ar an Déardaoin le rang – conas manglaim ón leabhair Peaky Blinders Cocktail Book a dhéanamh, nach deas? Beidh agallaimh le Mary Kennedy agus Gabriel Byrne ar siúl ar an Aoine, mar aon le rang cócaireachta le JP McMahon agus mias óna leabhar The Irish Cookbook á ullmhú aige. Páirteach in imeachtaí eile na féile, beidh Doireann Ní Ghríofa, Carlo Gébler, Manchán Magan… agus Beo ar Éigean! Bí liom féin, Áine agus Siún agus sinn ag labhairt ar na leabhair is deise linn agus a chuaigh i bhfeidhm orainn ó laethanta ár n-óige agus le blianta beaga anuas. Gach eolas ó dinglelit.ie
Ceardlanna sé seachtaine ar an bhfilíocht chomhaimseartha, ag tosú 16 Samhain
Le bheith ag múineadh na Gaeilge an aidhm a bhí ag Dean Farrell nuair a bhog sé go Ceanada an chéad lá riamh, agus is ann atá sé ó shin! Tá sraith ranganna tosaithe aige ar líne dóibh siúd a bhfuil spéis acu sa bhfilíocht agus sa Ghaeilge. Is cúrsa sé seachtaine atá i gceist aige, ar an bhfilíocht chomhaimseartha, dírithe orthu siúd a bhfuil Gaeilge réasúnta acu. Sleamhnaigh isteach ina theachtaireachtaí go díreach ar twitter @Seo_Deann le clárú.
Féile na nÉireannach, Oulu, 19-21 Samhain, ar-líne @theirishfestivalofoulu
Ar deireadh… beidh ceol na nGael le clos ag Féile na nGael in Oulu, sa bhFionlainn i rith na seachtaine. Thar thrí lá ón Déardaoin seo chugainn beidh scoth na gceoltóirí Gaelacha le feiscint ar líne – Caitlín Nic Gabhann, Ciarán Ó Maonaigh, Síle Denvir & Barry Kerr, Paddy Moloney agus Muireann Nic Amhlaoibh in éineacht le Gerry O’Beirne. Níl ansin ach cuid acusan a bheidh páirteach sa bhféile… caith súil ar an leathanach twitter atá acu @theirishfestivalofoulu do na mionsonraí ar fad!
