Beocht, saoirse agus na Rubberbandits!
Féasta na Picnice sa Phuball Gaeilge
Tharraing an Puball Gaeilge idir óg agus aosta le chéile ag an Phicnic Leictreach i gCo.Laoise ag an deireadh seachtaine agus is cinnte go mairfidh sé i gcuimhne a raibh i láthair go ceann tamaill fhada.
Tá moladh mór tuillte ag Rossa Ó Snodaigh agus a chairde ar fad as sárchlar ceoil agus siamsa a chur ar siúl arís i mbliana.
GaelGÁIRÍ a chuir tús leis an aicsean Dé hAoine agus tháinig sraith mhór siamsaíochta – ón cheoldráma ‘Bréalú’ go gig Spats Columbo – chun stáitse ina dhiaidh.
D’éirigh le cainteanna Imbolc tús machnamhach a chur leis an lá Dé Sathairn, agus bhí ‘Karaoke na n80í’, seit iontach leis an tríréad giofógach Na Latchikos agus filíocht leis na reacairí Séamus Barra Ó Súilleabháin, Carrie Harding agus Ciara Ní É i measc na mbuaicphointí a lean.
Sin ar fad sula gcuireadh tús leis an Chabaret Craiceáilte fiú, agus a leithéid de Chabaret, a chairde!
I measc noiméidí speisialta an EP, bhí Na Rubberbandtis, a phléasc amach ar an ardán gan choinne agus an t-amhrán mór ‘Róisín, Ba mhaith liom bruíon le d’athair’ a cheol acu, in éineacht le Muireann Nic Amhlaoibh.
Is beag nach ndeachaigh an puball agus an lucht féachana istigh ann ar eitilt leis an oiread fuinnimh a bhí le brath ann.
I measc na mbuaicphointí Dé Domhnaigh bhí steipeanna sexyáilte Sibéal Davitt, na drámaí ‘Éire: Conas teacht slán’ le Sean agus Niall McDonagh agus ‘Stair Wars’ le Fíbín, agus siamsa NÓS.
Onóir mhór do NÓS críoch cheolmhar a chur le himeachtaí an Phubaill Ghaeilge go ceann bliana eile agus a bhuíochas mór le Synead Toomey, Dysania, Rís, Navá agus Seo Linn as scoth an cheoil!
DSADNG!
Pictiúir le Sam Keenan agus Lisa Nic an Bhreithimh ó fhoireann Raidió na Life.