Blá Blá Blá…agus ceithre imeacht eile

Blá, Blá Blá, Drop Dead Twice, Sráid San Proinsias, BÁC 13, 14, 15 Meán Fómhair @ 19:00

Tá borradh faoin bhfuirseoir Bláithín de Búrca agus í tagtha thar n-ais ó Dhún Éideann na hAlban, áit a raibh sí ag tabhairt faoin bhféile cháiliúil Fringe. Is dírithe ar Fringe na hardchathrach atá sí an tseachtain seo, le sraith seónna, ar a dtugann sí Blá, Blá, Blá! Is plé painéil atá i gceist leis na hócáidí seo, ina gcuireann sí ceisteanna ar a réimse leathan aíonna. 

Le cúpla lá anuas, tá sí tar éis a bheith i mbun cainte le hOla Majekodunmi, Phillipa Ryder agus Wren Dennehy, i measc eile. Is í Bainisteoir Cumarsáide agus Feachtas, le Gluaiseacht na hEorpa, Lisa Nic an Bhreithimh a bheidh ar dhuine dá haíonna tráthnóna anocht, mar aon leis an bhfuirseoir Aoife O’Connor agus Carina Fitzpatrick ceoltóir agus taibheoir. ‘Sexuality agus Sex’ an t-ábhar a bheidh faoi chaibidil. Beidh aíonna eile ina teannta gach oíche, as seo go dtí an Domhnach.

Ceiliúradh an Bhlascaoid, Dún Chaoin agus an ceantar máguaird 13-15 Meán Fómhair ’19

 ‘Mícheál Ó Gaoithín: File, Fáidh agus Fear Feasa’  téama Cheiliúradh an Bhlascaoid i mbliana, agus is an deireadh seachtaine seo a bheidh sé ar siúl i nDún Chaoin agus sa cheantar máguaird. Osclófar tráthnóna é, agus cloisfear caint ó Eilís Ní Dhuibhne, faoin teideal ‘Scéaltaí, Scoláire, Draíocht: Micheál Ó Gaoithín agus Bo Almqvist’; Máirín Uí Shé a bheidh ina cathaoirleach ar sin. Chuir Bo, (a bhí pósta le hEilís), aithne ar Mhicheál sna 1950dí, agus is mó nath agus seanfhocal a bhailigh sé uaidh. 

Bronnfar sparánacht an Bhlascaoid i ndiaidh na cainte agus cloisfear ceol ó Tommy Ó Conchubhair chomh maith.

Ar an Satharn beidh Tadhg Ó Dúshláine ag trácht ar Mhícheál Ó Gaoithín  faoi chathaoirleacht Thomáis L. Uí Mhurchú, mar aon le Séamus Barra Ó Súilleabháin, agus Mícheál de Mórdha a bheidh ina chathaoirleach don gcaint sin. Seolfar leabhair agus beidh siúlóid treoraithe ar bun sa tráthnóna chomh maith.

Cloisfear cur síos ar Mhícheál mar ealaíontóir ar an Domhnach ó ealaíontóir eile atá ag cur fúithi sa cheantar le fada, sin í Maria Simonds-Gooding, sula gcuirfidh Pádraig Firtéar, Cathaoirleacht na Fondúireachta, clabhsúr le himeachtaí.

Caoimhín Ó Raghallaigh agus Thomas Bartlett, Coirm mar chuid d’imeachtaí Sounds from a Safe Harbour, St. Luke’s Corcaigh, Dé Sathairn 14 Meán Fómhair @ 20:00

Inniu an lá go hoifigiúil go bhfuil fáil ar albam Chaoimhín Uí Raghallaigh agus Thomas Bartlett. Tá cúpla traic cloiste againn go dtí seo ón mbeirt bhall seo don mbanna The Gloaming, ach fáil inniu air, ina iomláine! Is mé atá ag tnúth le héisteacht leis!

 Beidh siad le clos Dé Sathairn ag an bhFéile, Sounds from a Safe Harbour, a bhíonn ar siúl gach re bliain i gCorcaigh. St. Luke’s an t-ionad, agus is ann a bheidh siad, óna 20.00, osclófar na doirse timpeall 19:30.

Seisiún traidisiúnta ceoil, Áras na nGael, Sráid Dhoiminic, Gaillimh Dé Sathairn 14 Meán Fómhair @ 21:00

Bhíos sa Ghaillimh le déanaí, cathair aoibhinn – daoine deasa, cultúr, spraoi – cad eile a bheadh uait? Bhuel, más suim leat ceol traidisiúnta, is fiú a bheith ar an eolas go mbíonn seisiún traidisiúnta ceoil ar bun i gClub Áras na nGael, ar Shráid Dhoiminic gach Satharn. Cuirtear tús leis timpeall 21.00. Buail isteach más sa chomharsanacht a bheidh tú sna seachtainí romhainn!

Céilí, Dánlann Dillon, Cultúrlann McAdam Ó Fiaich, Béal Feirste, Dé Domhnaigh 15 Meán Fómhair @ 20:00

Cuiríg oraibh na bróga rince do chéilí i gCultúrlann McAdam Ó Fiaich! Is í Claire Hughes a bheidh i bhfeighil na hoíche agus í ag tabhairt treoracha do na rannpháirtithe, iad siúd a bhfuil taithí na mblianta acu, agus iad atá ar bheagán taithí! Scoth an cheoil, an chairdis agus an rince atá geallta, bíodh bhur gcosa ag bogadh ón hocht a chlog ar an nDomhnach.  £6.00 an costas, agus suipéar san áireamh!