Bhailigh slua breá le chéile ar an Sráidbhaile, Co.Laoise ag an deireadh seachtaine don bPicnic Leictreach.
Thosaigh an t-aicsean sa bPuball Gaeilge tráthnóna Dé hAoine le craoladh beo le Raidió na Life agus bhí Kíla, Imlé, Rís agus Spats Columbo i measc na mbannaí ar stáitse an oíche chéanna a chinntigh go raibh muintir an Phubaill Ghaeilge ag bogadh leo ar an urlár damhsa isteach sna huaireanta beaga.
Dé Sathairn, bhí idir dhrámaí, dhíospóireachtaí agus sheónna taitneamhacha eile ar siúl, ar nós ‘An Feadán Rua’, a spreag rannpháirtithe chun athghuthú Gaeilge a dhéanamh ar shean-scannáin phornagrafaíochta, faoi stiúir Hector Uí Eochagáin.
Bhí NÓS ar an láthair agus ba léir go ndeachaigh an ócáid go mór i bhfeidhm ar an lucht féachana.
Ní bheadh cóisir leictreach ar bith ina cóisir cheart gan An Cabaret Craiceáilte agus oíche Dé Sathairn bhí lucht an Phubaill Ghaeilge i mbun damhsa arís nuair a bhí Boss Sound Manifesto, Na Fadudas agus comrádaithe craiceáilte eile ar an stáitse.
Dé Domhnaigh, lean an scléip ar aghaidh le muintir ‘Gaelgáirí’, chomh maith le tráchtaireacht bheo ar Chluiche Ceannais Iomána na hÉireann.
Seo chugaibh blaiseadh (thuas) den méid a thit amach sa bPuball Gaeilge ag an deireadh seachtaine ag an bPicnic Leictreach 2015.
Pictiúir: Barbara Nic Dhonnacha (Glór na nGael) agus Cian Mac Carthaigh (Raidió na Life)
