In ainneoin gur chinn Rialtas na Breataine cúpla mí ó shin deireadh a chur leis an mhaoiniú bliantúil a chuireann sé ar fáil don Choirnis, tá cúpla bua faighte ag an teanga Cheilteach ó shin.
Thug fógra teilifíse de chuid an chomhlachta uachtar reoite Kelly’s ardú próifíle do theanga Chorn na Breataine nuair a craoladh é ar fud na Ríochta Aontaithe le déanaí, é a scaipeadh faoin haischlib #SpeakCornish
Anois tá tuilleadh airde á mhealladh ag muintir na Coirnise agus ag an bhanna ceoil The Changing Room ach go háirithe.
Grúpa folk iad seo a bhunaigh Tanya Brittain agus Sam Kelly sa bhliain 2014 agus ag a bhfuil an-dul chun cinn déanta ó shin.
Buaiteoirí an Chomórtais Amhrán ag an Fhéile Idirnáisiúnta Phan-Cheilteach in 2015 agus ag Gradaim Folk BBC Radio 2 i mbliana, canann The Changing Room i mBéarla agus i gCoirnis araon agus eiseofar an dara halbam acu, Picking Up The Pieces, i mí Lúnasa.
Ar an albam sin tá an t-amhrán gleoite nuascríofa ‘Gwrello Glaw’ (Go gCuire Sé Fearthainn) agus cúpla seachtain ó shin cuireadh físeán den amhrán – a taifeadadh i gcaladh Looe / Logh ar bhád darb ainm ‘Erin’ – beo ar Facebook.
Cheana féin tá breis agus 122,000 duine tar éis breathnú ar an fhíseán (thíos), agus níl sé deacair a thuiscint cén fáth.
Is sampla eile den scoth é seo de chur chun cinn teangacha dúchasacha tríd an cheol, in ainneoin na n-ainneoin.
Kernewek abú!
Is féidir breis eolais a fháil faoi The Changing Room ar thechangingroommusic.com
