‘A Ghaela, tógaigí bhur gcroíthe!’
Traic nua lán misnigh ó JJ Ó Dochartaigh

Ní dhéanfaidh aon duine a bhí i láthair ag na mórshiúlta dearga anuraidh dearmad ar an atmaisféar cróga dóchasach a bhí le mothú san aer.

Anois, dá mba mhian le duine ar bith an t-atmaisféar céanna úd a bhlaiseadh arís níl le déanamh acu ach éisteacht leis an rian úrnua seo atá eisithe ag an amhránaí as Cathair Dhoire, JJ Ó Dochartaigh.

Bheadh aithne ag Gaeil Uladh ach go háirithe ar an cheoltóir óg seo mar gheall ar a chuid aistriúchán agus amhrán nuachumtha atá á gcanadh aige ag gigeanna fud fad an chúige le tamall anuas.

Tá páirtnéireacht úr déanta aige anois le fear Gaelphop, Cricky Ó Marcaigh, agus is é an leagan snasta seo de ‘A Ghaela’ an toradh atá air.


Éist le ‘A Ghaela’:


Rosc catha ceart é ar son na Gaeilge le tiúin an-ghreamúil agus liricí láidre a dhéanann tagairt do stair na hÉireann agus do chás reatha na teanga.

“Bhí muid amuigh ag siúl, Gairdíní an Chuimhneacháin ar ár gcúl,
Cearta teanga a bhí muid á lorg, na mílte ar na sráideanna Dearg le Fearg!
Oirthear, Iarthar, Thuaidh is Theas,
Enda Kenny, dia ár sábháil, taispeáin dúinn meas!”

Deir JJ go raibh sé ag iarraidh amhrán a scríobh a thabharfadh misneach do phobal na Gaeilge, daoine óga ach go háirithe.

“Chonacthas domh go raibh cuid de Ghaeil óga na tíre faiteach nó cúthaileach maidir leis an Ghaeilge a labhairt agus a fhoghlaim,” ar seisean.

“Bhí mé ag iarraidh spreagadh agus misneach a thabhairt dóibh le go mbeadh siad bródúil as a gcultúr agus as a dteanga dhúchais.

“Sin bunús an amhráin agus tá súil agam go mbeidh níos mó Gael anois lena ndorn san aer ar son na teanga dá bharr.”

Le rian chomh spreagúil leis seo, is cinnte go mbeidh… seasfaidh muid le chéile!