Just Mustard – Heart Under (Partisan)
N’fheadar go díreach cad a bhíonn ag déanamh scime do Just Mustard ach ó thaobh speictream na mothúchán de bogann Heart Under ó anó go huaigneas go buairt gan dul in aon áit níos dearfaí.
Conas atá Heart Under á mholadh agam, mar sin? Bhuel, bíodh is go mbíonn Katie Ball ag cnáimhseáil de shíor, tá glór fíneáilte aici a chuireann Alison Shaw ón ngrúpa Cranes i gcuimhne dom. Nuair a cloistear é le hais giotár loiscneach David Noonan agus Mete Kalyoncouglu ar amhráin mar ‘In Shade’ agus ‘I Am You’ is aoibhinn an rud é.
Duncan Marquiss – Wires Turned Sideways In Time (Basin Rock)
Albam gleoite, bunaithe ar cheol an ghiotáir ar a bhfuil rithim mheicniúil na cathrach (an mhonarcha, an meitreo, máirseáil na maidine chun na hoifige) agus saoirse sceirdiúil, idir aoibhinn agus uaigneach, saol na tuaithe le braistint ina gcóimhéid. Éist leis an gcéad rian, ‘Drivenhalle’, go gcloise tú cad atá i gceist agam.
Más spéis leat ceol leictrea-fhuaime Steve Reich, rac-cheol Gearmánach na stíle kosmiche (Neu!, Popol Vuh), nó gormacha iar-nua-aoiseacha ó leithéidí John Fahey agus Ry Cooder bí cinnte cluas a thabhairt don albam seo.
Meitei – Kofū II (Kitchen)
Léiritheoir Seapánach é Daisuke Fujita (Meitei), agus is machnamh é a cheol
impriseanaíoch sampla-bhunaithe ar shaol mhuintir a thíre dhúchais sa sean-am. Ceol a chuireann J. Dilla agus Steve Reich i gcuimhne dom, babhtaí, ach a bhfuil blas iomlán Seapánach air mar sin féin.
Tá an ceathrú halbam seo dá chuid, Kofū II, lán de scéalta fuaime leathinste faoi shamúraí fánacha, áitribh thréigthe, sleamhnú an tseanóra i dtreo an bháis agus misneach dochoiscthe na hóige.
Noda & Wolfers – Tascam Space Season (Nightwind)
Cad a tharlaíonn nuair a castar ar a chéile saoithín sintéiseora Ísiltíreach (Danny Wolfers AKA Legowelt) agus ceoltóir melodica Seapánach (Taka Noda) a bhfuil a chroí istigh sa dub-cheol? Saothar spraíúil digi-dub a fhuaimníonn ar nós Augustus Pablo amú sa spás le dream neacha eachtar-réaltrach dea-mhéiniúla. Fuaimeanna fíréanta.
Pádraig Rynne – Begin With The End In Mind (Liosbeg)
Ceol consairtín na Mumhan ar liosta na bliana seo faoi dhó– cé a cheapfadh é?
Filleadh ar cheol traidisíunta na hÉireann atá sa chéad albam aonair seo a bhfuil eisithe ag Rynne le fada an lá. Molaim guailleáil nótaí na bpreabphort féin-chumtha ‘The Humours Of Pinot’ agus ‘A Winning Season’, ach thar aon rud eile is breá liom chomh spéiriúil, éasca is a fhuaimníonn poirt a bhfuil sean-aithne agam orthu agus Rynne ag tabhairt fúthu.
Sababa 5 – Sababa 5 (Batov)
Bíonn mo chluasa ar bior d’aon cheol nua ón ngrúpa Khruangbin ach ní rabhas róthógtha leis an gceirnín dteannta Vieux Farka Touré a d’eisíodar i mbliana. Ar shlí, líon an début seo de chuid an ghrúpa Sababa 5 as Tel Aviv an bhearna a chruthaigh iarracht lagmheasartha Khruangbin.
Func-cheol domhanda sicidéalach gan náire atá romhat anseo. Ceol cumaisc a dheineann neamhaird des na teorainneacha cultúrtha idir an Iaráin, an tSomáil, an Tuirc, an Éigipt agus an Aetóip.
Silvestre – Sossegado (Padre Himalaya)
Bíonn blas trópachach éigin ar gach a eisíonn Joao Silvestre, léiritheoir as Lisboa. Fiú agus éagsúlacht stíleanna idir lámha anseo ag Silvestre – grime, teicneo, house agus leictreo ina measc – gluaiseann Sossegado go haoibhinn grástúil ó thús go deireadh buíochas le nós an Phortaingéalaigh úsáid a bhaint as glór sampláilte an duine mar phríomhshéis ar an bhformhór dá chuid rianta.
Func teibí as taobh geall na sráide.
Bob Vylan – The Price Of Life (Ghost Theatre)
Cur síos nimhneach ar shaol an fhir bhoicht ghoirm i Sasana na ré iar-Bhreataimeachta atá in The Price Of Life, an dara halbam eisithe go dtí seo ag an MC punc-grime léaspach Bob Vylan.
Tá The Price of Life punc go smior d’ainneoin go bhfuil Vylan chomh mór faoi chomaoin ag stíleanna nach ceol giotár-bunaithe iad – func Pigbag (‘Wicked and Bad’), abair, hip-hap Public Enemy, réabhcheol 808 State (tá liricí ‘Take That’ ráite thar ‘Cubik’ dá gcuid) agus reigé The Specials (‘Health Is Wealth’) – agus atá se ag fuaim Sex Pistols nó Suicidal Tendencies.
Tuigim go raibh Vylan ag crochadh thart le Kneecap i mBéal Feirste le déanaí. N’fheadar an mbeidh siad le clos i mbun ceoil i dteannta a chéile amach anseo?!
Work Money Death – Thought, Action, Reaction, Interaction (ATA)
Cúirtéis cheoil do dhuine d’fhíoruaisle an tsnagcheoil spioradálaigh – an sacsafónaí Meiriceánach Pharoah Sanders a d’imigh ar shlí na fírinne i bhfómhar na bliana seo – atá i gceist leis an dara halbam seo de chuid an ghrúpa Work, Money, Death as Yorkshire.
Ceithre mhachnamh ar iontaisí agus ar dhúshláin an tsaoil aistigh seo atá sa cheithre phort seo, ar leagadh go téip iad in aon téic amháin gan aon réamhchleachtadh.
Lón anama sóúil.
µ-Ziq – Magic Pony Ride (Planet Mu)
Albam uimhir a 15 ó Mike Paradinas faoin ainm cleite µ-Ziq. N’fhéadfá rá go bhfuil rud ar bith ar siúl anseo nach bhfuil déanta cheana aige, ach táimse den tuairim go bhfuil Magic Pony Ride níostaitneamhaí ná fadsaothar ar bith eile dá chuid.
Bunús na fuaime anseo ná ceol jungle na nóchaidí , ach ba thuras ag breacadh an lae ar dhroim chapaill thar thír-raon reoite na hÍoslainne a mhúscail fonn Paradinas na poirt a chumadh. Samhlófá, cinnte, gathanna gréine frithchaite ag dromchla oighreata leis an tslí a dtéann foinn mhilse na bpíosaí seo ag preabadh timpeall an raon-fuaime. Geaitsíocht glhiondrach ó ghobharnóir geanúil stábla Planet Mu.
