Amhrán na hAoine:
'Amhrán Nollag do 2016’ le GaelGÁIRÍ & cairde


Gach Aoine ar NÓS bíonn cluas á tabhairt againn le hamhrán nua-chumtha Gaeilge ar leith.

Agus an Nollaig ag teannadh linn, tá áthas orainn go bhfuil amhrán grinn nua Nollaigiúil againn le roinnt libh, agus físeán ceoil le dul leis, atá eisithe ag GaelGÁIRÍ agus a gcuid cairde.

‘Amhrán Nollag do 2016’ an t-ainm atá air agus is é Eoin P. Ó Murchú (thíos), duine de bhunaitheoirí GaelGÁIRÍ agus scríbhneoir rialta leis an iris seo, a chum na liricí.

Amhrán barrúil bríomhar a bhfuil a theanga ina leathphluc aige agus a ardaíonn ceist faoi Dhaidí na Nollag a bheith… in Isis!

Chomh maith le hEoin, tá fuirseoir aitheanta Gaeilge eile, Aedin McQueen, agus Cian Mac Carthaigh ón ghrúpa IMLÉ le cloisteáil ar an taifead.

Obair ghrúpa a bhí san amhrán agus scaipeadh é i measc an triúir acu ar líne sular chuir an fear fuaime Steve McGrath, ó Macalla Teo, a dhraíocht féin leis.

Labhair muid le hAedin (thíos) lena thuilleadh a fháil amach faoi.

1) Cad é cúlra an amhráin ghrinn seo?

Is é smaoineamh Eoin a bhí ann agus is é a chuir creatlach an amhráin chugam ar líne. Bhí sé féin á cheol agus ag iarraidh fáil amach cad a cheap mé faoi.

Shíl mé go raibh sé greannmhar. Sheinn mé do mo dheirfiúr é agus cheap sise go raibh sé greannmhar. Bhí go maith.

Ansin sheinn mé é do mo mham é.

Cheap mo mham go raibh sé uafásach agus bhí a fhios agam láithreach go mbainfeadh sé gáire as daoine!

2) Cén fáth a bhfuil sibh ag spochadh as Daidí na Nollag?

Bhuel, tá féasóga go mór i mbéal an phobail san am inniu.

Ar lámh amháin, bíonn siad le feiceáil ar pheileadóirí, ar pholaiteoirí agus ar hiopstairí gruagacha araon.

Ach ar an lámh eile, tá amhras agus eagla ar roinnt daoine roimh fhéasóga mar go ndeirtear linn gur tréith chomónta í an fhéasóg i measc ‘sceimhlitheoirí’.

Mhothaigh Eoin nach hiopstar é Daidí na Nollag, nach peileadóir é agus nach polaiteoir é ach oiread… agus mar sin gur mó seans go bhfuil Daidí na Nollag in Isis.

Tá sé dorcha go leor (ag gáire).

3) An bhfuil líne ar bith a thaitníonn leat féin?

Ceapaim go bhfuil roinnt de na rímeanna iontach greannmhar ar fad. Seo sampla:

“Blianta eile thug sé Lego dom is stocaí do mo dheaid,
Ach i mbliana níl sa mhála ach beagán beag jihad!”


Lirící Amhrán Nollag do 2016

Daidí na Nollag: Hó hó hó hó hó, heileó a pháistí!

Tá sneachta ar an talamh, tá fuacht san aer,
tá an crann Nollag in airde, is gliondar sa spéir
Ach a pháistí bígí ciúin is éistigí anois,
tá Daidí na Nollag in ISIS

Smaoinígí faoi!

Tá féasóg mhór air, is éadaí traidisiúnta,
Eitlíonn sé san aer, briseann isteach i dtithe dúnta
A pháistí bígí ciúin is éistigí anois,
tá Daidí na Nollag in ISIS

Conas nár thuigeamar é seo cheana féin?

A dhlí a chur i bhfeidhm ar fud an domhain
is daoine a mharú nach gcreideann ann.
A pháistí bígí ciúin is éistigí anois,
tá Daidí na Nollag in ISIS

Nach mbeidh bronntanais aige dúinn?

Conall, Pól, Áine, Éibhín agus Evan
Ná bacaigí na liostaí, gheofar AK47
A pháistí bígí ciúin is éistigí anois,
tá Daidí na Nollag in ISIS

Á tuigimid anois!

Blianta eile thug sé Lego dom is stocaí do mo dheaid
Ach i mbliana níl sa mhála ach beagán beag jihad!
A pháistí bígí ciúin is éistigí anois,
tá Daidí na Nollag in ISIS

Gach duine!

A pháistí bígí ciúin is éistigí anois,
tá Daidí na Nollag in ISIS

Gach duine le chéile!

A pháistí bígí ciúin is éistigí anois,
tá Daidí na Nollag in ISIS

Daidí na Nollag: Hó hó hó hó hó.