Gach Aoine ar NÓS beidh cluas á tabhairt againn le hamhrán nua-chumtha Gaeilge ar leith.
An tseachtain seo, labhair Pádraig ‘Muipéad’ Ó Conghaile ón ghrúpa IMLÉ linn faoina n-amhrán nua, ‘Fun Orm’.
Is banna spreagúil nuálach de cheathrar ceoltóirí iad IMLÉ ina bhfuil an dordghiotáraí Cian Mac Cárthaigh, an t-amhránaí agus giotáraí Fergal Moloney, an file agus ceoltóir Marcus Mac Conghail agus an fíodóir focal MC Muipéad.
Lán func agus filíochta, tarraingíonn IMLÉ ar mheascán breá stíleanna. Bhuaigh siad ‘Nuíosach na Bliana’ ag Gradaim Cheoil NÓS 2015 agus tá an rian áirithe seo ar an ghearrliosta don chomórtas náisiúnta amhrán Pan-Cheilteach 2016.
Faoi láthair, táthar ag “ag gluaiseacht ar aghaidh” sa stiúideo ar a n-albam début agus muid ag súil go mór leis!
Éist le ‘Fun orm’ agus léigh faoi!
1) Inis dúinn faoi chúlra ‘Fun Orm’?
Go minic nuair a scríobhaim amhrán ar bith, bím ag tarraingt ar mhothúcháin agus scríobhaim amhrán chun ciall a dhéanamh dóibh.
Is dócha le ‘Fun Orm’, tá sé uilig faoi ag iarraidh a bheith ag seinm agus ag déanamh gigeanna agus a bheith ag cloí leis an rud a dhéanann sásta thú, agus le cur i gcuimhne duit gur cheart coinneáil ort.
D’fhéadfá a bheith in ísle brí in amanna, ach ná déan dearmad ar an fáth ar thosaigh tú.
Ní bhíonn rudaí i gcónaí éasca, bíonn rudaí deacair.
2) An bhfuil teachtaireacht ar leith ann?
Ní maith liom é a mhíniú go díreach.
Ar bhealach sílim go bhfuil amhrán ar nós píosa ealaíne ar bith agus gur cheart do thuiscint féin a thógáil uaidh.
Go bunúsach, an rud is tábhachtaí faoi ná a bheith ag coinneáil ag foghlaim agus sin an rud a choinneoidh slán tú.
3) An bhfuil líne ar bith ar leith a thaitníonn leat?
Tá agus tá sé an-ghar don méid atá díreach ráite agam.
“Ach coinneoidh mé orm ag foghlaim agus beidh mé slán.”
LIRICÍ: Fun Orm
Scaití ní dhéanann tú na rudaí a theastaíonn uait
mar gheall go bhfuil an iomarca imní ort go dteipfeadh ort
Nuair a bhíonn fonn orm, déanaim gleo ag na gigeanna
is den chuid is mó den am, sin an chaoi a n-imíonn mé
Is breá liom a bheith ag úsáid suas mo chuid fuinnimh
Nuair a thagann sé go dtí ceol cumadh canadh
Is breá liom sin, chun a bheith ag labhairt mo intinn
má dhéanann tú sin tabharfaidh sé cumhacht duit
nach dtuigfeá riamh a bheadh agat dá uireasa
sé seo an chumhacht atá againne mar dhaoine
Sé sin do mheon do spiorad agus do shaoirse
a chuir i bhfeidhm, déanaim sin le seinnt
ceol le mo ghlór i gclubanna agus roinnt
pubanna, féilte chomh maith le tithe cairde
Admhaím nuair a thagann sé go dtí taifeadadh
go bhfaigheann mise é seo i bhfad níos deacra
ní de bharr na focla abairtí a dheirimse
Ach de bharr an fuaimniú fuinnimh atáim ag iarraidh
Curfá
a chur amach in san domhan, ach tá mé óg
tá sé ráite roimhe seo an dallamullóg
a chuirim orm féin ó am go ham
ach coinneoidh mé orm ag foghlaim agus beidh mé slán
a chur amach in san domhan, ach tá mé óg
tá sé ráite roimhe seo an dallamullóg
a chuirim orm féin ó am go ham
ach coinneoidh mé orm ag foghlaim agus beidh mé slán
Ceann de na fáthanna a thosaigh mise leagan focla
síos ar pháipéar ná chun go mbeadh rudaí soiléir
I mo shaol mo shlí níos éasca dá bharr
seo go daonna mar go gcruathaím i nGaeilge
mo dhúchais, mo thús, an chéad teanga
a tháinig amach as mo chlab gan stad
go dtí gur labhair mé le máthair an penguin
orm a bhí an déistin ach raibh mé in ann ciall a bhaint
Ón teilifís go dtí ní bheinn ar bís
buachaill beag mar mé, is orm a bhí an straois
gan i bhfad caite gan mé ach sé bliana d’aois
D’fhoghlaim mé béarla is níor lig mé duine ar bith síos
Mar sílim féin is mó teangain a bhfearr
is má bhíonn tú líofa, is cumadh fiú níos fearr
seasann sé leat níos mó a thugann tú isteach
agus sin é go díreach atá mé ag rá leat
Éist.
Sé sin do mheon do spiorad agus do shaoirse
a chuir i bhfeidhm, déanaimse sin le seinnt
ceol le mo ghlór i gclubanna agus roinnt
pubanna, féilte chomh maith le tithe cairde
Admhaím nuair a thagann sé go dtí taifeadadh
go bhfaigheann mé é seo i bhfad níos deacra
ní de bharr na focla abairtí a dheirimse
Ach de bharr an fuaimniú fuinnimh atáim ag iarraidh
a chur amach in san domhan, ach tá mé óg
tá sé ráite roimhe seo an dallamullóg
a chuirim orm féin ó am go h-am
ach coinneoidh mé orm ag foghlaim agus beidh mé slán
(x 4)
