Tá iarracht ar bun foraois iomlán in Eacuadór a aithint go dlíthiúil mar chomhchruthaitheoir amhráin.
Cuirfear achainí faoi bhráid údarás cóipchirt Eacuadór gan mhoill chun aitheantas a thabhairt don néalchoill Los Cedros mar bhall den fhoireann a chruthaigh an t-amhrán ‘Song of the Cedars’ (Amhrán na gCéadar).
Is é an ceoltóir Cosmo Sheldrake, an scríbhneoir Robert Macfarlane, an míceolaí Giuliana Furci agus an scoláire dlí César Rodríguez-Garavito a chum an t-amhrán agus iad ar thuras allamuigh in iarthuaisceart na tíre ar mhaithe le taighde a dhéanamh do leabhar nua de chuid Macfarlane ina bpléann sé na cearta bunúsacha atá ag an dúlra féin.
“Ní san fhoraois a scríobhadh an t-amhrán, is leis an fhoraois a scríobhadh é,” arsa Macfarlane.
“Ar feadh seal gairid bhí muid mar chuid de bheatha leanúnach na foraoise agus ní fhéadfadh muid é a scríobh gan an fhoraois. Comhúdar atá ann gan aon agó.”
Néalchoill atá in Los Cedros agus tá na fuaimeanna iomadúla atá le cluinstin inti – moncaithe, ialtóga, feithidí agus an fásra féin – fite fuaite i bhfabraic an amhráin.
“An fuaimdhreach a bhaineann le héiceachóras ar leith, is rud uathúil é sin,” arsa Cosmo Sheldrake, ar mac é leis an eolaí chlúiteach Shasanach, Rupert.
“Is féidir smaoineamh ar chónascadh na bhfuaimeanna ar fad mar ‘guth’ na háite. In éiceachóras sláintiúil, d’fhorbair na speicis ar bhealach a bhféadfadh siad cumarsáid a dhéanamh le chéile gan fuaimeanna a chéile a mhúchadh. Foinse mhór inspioráide a bhí sa mhéid sin. Guth beo Los Cedros atá san amhrán seo.”
Tá abhár dóchais áirithe ag an fheachtas nó in 2021 chinn cúirt bhunreachtúil Eacuadór gur eintiteas dlíthiúil é an néalchoill, breithiúnas stairiúil a chuir cearta mianadóireachta ar ceal sa dúiche.
Má éiríonn leis an achainí reatha, beidh sé ar an chéad uair riamh i stair na cruinne a bheidh neach nach duine daonna é aitheanta mar údar morálta saothair ealaíne.
Is féidir éisteacht le ‘Song of the Cedars’, agus tú féin a thumadh i bhfuaimeanna saibhre Los Cedros, ar Youtube agus Spotify.
