Le gach albam d’indie-rac lán mionchórdaí dea-chóirithe agus mothúcháin an mhíshuaimhis a eisíonn The National méadaíonn lucht éisteachta an ghrúpa.
Táimid ar fad, de réir dealraimh, lán d’imní eiseach, agus tugann ceol The National faoiseamh catairseach éigin do roinnt mhaith againn.
Ach má tá aon albam dá gcuid i do bhailiúchán agat – is é Boxer mo rogha féin – an bhfuil gá agat lena seachtú halbam, Sleep Well Beast?
Is é tuairim an scríbhneora seo nach bhfuil.
Níl aon athrú poirt anseo, agus ar uairimh mheasfá amhránaí an ghrúpa, Matt Berninger, chomh compordach is é sáinithe thíos ag bun thobair an éadóchais nach mbéarfadh sé ar an rópa fiú dá dtiocfadh duine éigin i gcabhair air.
An aimseodh sé riamh láthair níos oiriúnaí dá ghuth dorcha baratóin?
Ar ‘Guilty Party’ canann Berninger mar gheall ar a phósadh a bheith curtha ar ceal.
Bheadh trua agat don bhfear bocht go dtí go dtuigeann tú nár scar Berninger óna bhean in aon chor, agus gur chabhraigh sí féin leis slacht a chur ar liricí an amhráin.
Nach céim chomhbhá rómhór í éisteacht le ceannaire saibhir, meánaosta ar cheann dos na rac-ghrupaí is mó dá bhfuil ann ag déanamh buartha faoi thubaiste phearsanta nár thárla dó, fiú?
Ba chuma leat, b’fhéidir, dá mbeadh amhrán maith in ‘Guilty Party.
Fiú ag glacadh leis gur ‘growers‘ iad amhráin The National, a théann i bhfeidhm ort diaidh ar ndiaidh, ní aimseoidh mé filíocht sna línte “It’s nobody’s fault, no guilty party / I’ve just got nothing, nothing left to say” is cuma chomh minic is a chloisim iad.
Ní shin le rá gur droch-albam ina iomlán é Sleep Well Beast.
Albam rófhada é, is mhairfinn gan píosaí liobarnacha mar ‘Born To Beg’, ‘Turtle Neck’ agus ‘Dark Side of The Gym’ a chlos arís, ach tá roinnt bheag scoth-amhrán le clos anseo is ansiúd.
Tús gleoite é an ‘Nobody Else Will Be There’, lena chórdaí saibhre pianó i stíl ‘Fake Empire’.
Aintiún indie breá briosc, biorach é ‘The Day I Die’.
D’fhéadfadh mantra don Meiriceánach le linn uachtarántacht Trump a bheith i gceist leis na línte “Forget it. Nothing I change changes anything / I won’t let it, I won’t let it ruin my head” ó ‘Walk It Back’.
Éiríonn le greann tirim na línte “I try to save it for a rainy day, it’s raining all the time / Until everything is less insane, I’m mixing weed with wine”, níos faide isteach san amhrán céanna.
Ach tar éis tamaill cuireadh easpa misnigh Berninger as duit.
“I have no positions, no point of view or vision / I’m just trying to stay in touch with anything I’m still in touch with”, a deir sé ar ‘I’ll Still Destroy You’.
Tá le tuiscint gur lena iníon atá sé ag caint, ach nuair a scaoileann sé na línte “Put your heels against the wall, I swear you’ve got a little bit taller since I saw you / I’ll still destroy you” beidh trua agat don gcailín nach ndéanfadh a hathair iarracht níos fearr chun bheith ina mháistir ar a mhothúcháin.
Eiseofar Sleep Well Beast amárach, 8 Meán Fómhair.
