‘Begin With The End in Mind’ agus Albaim eile na Míosa

Duncan Marquiss – Wires Turned Sideways In Time (Basin Rock)

Maidir leis an gceol a taifeadadh le linn na dianghlasála, tá idir mhaith agus olc ann. Roinn mórán ceoltóirí a gcrá croí agus a n-easpa dóchais a bhrú linn, i gcruth sonach. Thuigfeá dóibh, na créatúir, ach nuair atá cúrsaí an tsaoil i mo chúinne is ceol a bhfuil ardú meanman ann atá uaim seachas a mhalairt. 

Buíochas, mar sin, go raibh catagóir eile ceoltóirí i mbun gnímh le linn na tréimhse sin: iad siúd a thapaigh an deis, fad a bhí stop rith agus rás an tsaoil, chun suí síos in áit chiúin agus an magnum opussin a bhí sa cheann acu le fada an lá a thaifeadadh.

Cuir i gcás Duncan Marquiss, giotáraí The Phantom Band. Thug sé na cosa leis as cathair Ghlaschú go garáiste a thuismitheoirí i gceantar tuaithe in oirthuaisceart na hAlban le díriú ar a chéad-albam aonair, Wires Turned Sideways In Time. Albam gleoite, giotár-bhunaithe é ar a bhfuil rithim mheicniúil na cathrach (an mhonarcha, an meitreo, máirseáil na maidine chun na hoifige) agus saoirse ghaothshéidthe, idir aoibhinn agus uaigneach, saol na tuaithe le braistint ina gcóimhéid. Éist leis an chéad rian, ‘Drivenhalle’, go gcloise tú cad atá i gceist agam. 

D’ainneoin go bhfuil meas Marquiss ar cheol leictrea-fhuaime Steve Reich, ar rac-cheol Gearmánach na stíle kosmiche na 70í (Neu!, Popol Vuh), ar ghormacha iar-nua-aoiseacha John Fahey agus Ry Cooder agus, i gcás an riain ‘Double Murmer’, ar dhordlínte Peter Hook (Joy Division/New Order) le sonrú, ach ní haon saothar in aisce gan físe é seo.

Máistriúil.

Padraig Rynne – Begin With The End In Mind (Liosbeg)

Seans go bhfuil aithne agat ar Phádraig Rynne cheana féin óna thogra ceoil leictreonaice Aeons i dteannta Mhuireann Nic Amhlaoibh, nó mar an draoi consairtín leis an ngrúpa cumaisc Notify

Filleadh ar cheol traidisiúnta na hÉireann atá sa chéad albam aonair seo dá chuid le seacht mbliana déag anuas. Tá cúig chinn de phoirt féin-cumtha le clos, agus díobh sin molaim guailleáil nótaí na bpreabphort ‘The Humours Of Pinot’ agus ‘A Winning Season’, go háirithe, ach luach an albaim bhreá seo ná chomh spéiriúil éasca is a fhuaimníonn poirt a bhfuil sean-aithne agam orthu agus iad seinnte ag méara Rynne.

Ceolteóirí Éagsúla – E-Beamz presents Continuum-z (E-Beamz)

Tá tuairim agus 30 bliain imithe tharainn ó tháinig ceol jungle ar an saol. Cé go bhfuil an stíl linn ó shin, i gcruth amháin nó i gcruth eile (drumfunk, go háirithe), buíochas do ghlúin óg léiritheoirí mar Sully, Coco Bryce agus Tim Reaper tá bunfhuaim chasta spleodrach fhuinniúil jungle tar éis aiséirí as luaithreach an dordcheoil le blianta beaga anuas.

Díríonn an cnuasach seo de chuid an lipéid E-Beamz ar cheol na glúine óige seo, go háirithe. Aistodhchaíochas don chaighdeán is airde atá romhat. Mo rogha féin de na rianta is fearr anseo ná an ‘How The River Flows’ gleoite de chuid an phiscín is sciliúla sa dúthaigh ó thaobh cóiriú na mbuillí de, Tommy The Cat na hÍsiltíre, ‘Things You Don’t Do’ de chuid Mani Festo agus Denham Audio lena, liricí sampláilte éagaoineach R&B, agus ‘Let’s Talk About The Trust Fund’ de chuid DJ Decay – port brúdúil le tréan-buille 4/4 a bhuaileann tuí na bpunann ort. 

Meidhréiseach.