Breithlá sona Leonard
Bronntanas ceoil ó Liam Ó Maonlaí


Tá an ceoltóir iomráiteach Ceanadach Leonard Cohen 81 bliain d’aois inniu.

Aitheanta i measc na scríbhneoirí ceoil is fearr agus is bisiúla ar domhan le 60 bliain anuas, is liosta le háireamh iad na hamhráin chumhachtacha atá cumtha aige ó thosaigh sé amach sna 1950í, leithéidí ‘Halleljuah’, ‘So Long, Marianne’ agus ‘Suzanne’.

Trí bliana ó shin d’aistrigh na filí Gabriel Rosenstock agus Liam Ó Muirthile rogha amhrán le Cohen go Gaeilge mar chuid den fhéile litríochta IMRAM agus chan Liam Ó Maonlaí, David Blake, Hilary Bow agus an Brad Pitt Light Orchestra iad ag ócáid speisialta le linn na féile.

Mar bhronntanas beag do Leonard, seo thuas an tUasal Ó Maonlaí ag ceol ‘Suzanne’ ina bhealach leithleach tarraingteach féin.

Tá na liricí áille le fáil thíos.

Beidh IMRAM 2015 – a bhfuil togra an-spéisiúil eile ceoil mar chuid de i mbliana – ar siúl i mBaile Átha Cliath 9 – 18 Deireadh Fómhair… tuilleadh eolais faoi ag teacht go luath.

cohen-gaeilge

Suzanne

Suzanne cois na habhann
Greim láimhe ar a chéile
Is is clos na báid ag gluaiseacht
Beidh tú léi ar feadh na hoíche.
Agus tá sí leathchraiceáilte
Sin an fáth a bhfuil tú léithi:
Seo chugainn tae anois ’s oráistí
Ó chuanta na Síne
Is tú ar tí anois a rá léi
Nach bhfuil grá agat le tabhairt di
Ar a tonnfhad breá atá tú
Ag an abhainn atá an freagra:
Bhí tú riamh mar leannán aici:
Is ba mhaith leat taisteal léithi
Is ba mhaith leat taisteal dall
Mar tá muinín aici asat –
Is bhí d’aigne sáite riamh ina cabhail.

Is bhí Íosa ina loingseoir
Nuair a shiúil Sé ar an uisce
Is bhí feitheamh fada fuar ann
Óna thúr adhmaid uaigneach,
Is nuair tuigeadh Dó gan bhréag
Nach mbeadh radharc Air ach san éag:
‘Bíodh gach éinne ina loingseoir
Go saorfaidh an mhuir mhór iad.’
Ach bhí Sé briste brúite
Sula n-osclódh na spéartha,
É tréigthe, nach mór daonna,
Bádh faoi do ghaois-se É mar chloch.
Is ba mhaith leat taisteal Leisean
Is ba mhaith leat taisteal dall
Ba mhaith leat É a thrustáil –
Bhí A aigne sáite ionat riamh anall.

Tá do lámh ag Suzanne
Agus seo libh chun na habhann
Lena ceirteacha is cleití
Ó Naomh Uinseann bocht de Pól
Tá an ghrian ag doirteadh meala
Ar ár maighdean ’tá sa chuan.
Agus deir sí ‘Féach arú
I measc an bhruscair is na mbláth.
Tá na Fianna san fheamainn
Is tá leanaí ann ar maidin.
Táid ag síneadh chun an ghrá
Agus is amhlaidh a bheidh choíche.’
Ag Suzanne ’tá an scáthán:
Is ba mhaith leat taisteal léithi
Is ba mhaith leat taisteal dall
Mar tá muinín aici asat –
Is bhí d’aigne sáite riamh ina cabhail.

Leonard Cohen 1966 / Aistrithe ag Gabriel Rosenstock 2011