Thug KNEECAP, an banna ceoil hip-hap as Béal Feirste, gach gradam ar ainmníodh iad lena n-aghaidh ag Gradaim Cheoil NÓS 2019, a reáchtáladh in The Sugar Club i mBaile Átha Cliath ag an deireadh seachtaine.
Cúig ghradam ar fad a tháinig aneas go Béal Feirste le Móglaí Bap, Mo Chara agus DJ Próvaí, a bhí i láthair ag an ócáid bhronnta san ardchathair Dé hAoine — an t-amhrán is fearr, an t-albam is fearr, an físeán is fearr, an ealaín albaim is fearr agus an banna ceoil is fearr.
Ocht gcatagóir ar fad a bhí ann agus 28 ceoltóir ainmnithe sna rannóga éagsúla. Bhuaigh Woodheart an gradam don nuíosach is fearr, bhuaigh Cárthach Mac Craith an gradam don albam ceoil traidisiúnta is fearr lena albam An Tobar Séimh, agus ba é an Puball Gaeilge a mheall an líon is mó vótaí sa rannóg vóta poiblí ‘Féile Cheoil Is Fearr’.
Craoladh an ócáid bhronnta, ag ar chas ceoltóirí ar nós Enda Reilly, Síomha, Tadhg agus Geal, agus an DJ Ben Ó Faoláin, beo ar RTÉ Raidió na Gaeltachta agus bhí sruthú beo á dhéanamh ar an ócáid ar leathanach Facebook an stáisiúin. Rónán Mac Aodha Bhuí agus Sinéad Ní Uallacháin a chuir an clár speisialta i láthair.
