Seolfaidh Doimnic Mac Giolla Bhríde a albam nua Gealach na gCuanta ar an 25 Meitheamh ag oíche speisialta den cheol thraidisiúnta, ‘Ceol sa Dúchas’, in Áras Mhic Reachtain i mBéal Feirste. Cluinfear Doimnic ag canadh agus ag seinm ar an phianó ar an albam agus ar an oíche féin. Leis, beidh ceoltóirí iontacha eile, mar atá Frances Morton a bheidh ar an fheadóg mhór, Éanna Ó Cróinín ar na píb uilleann, Tomás Mac Seáin ar an vióla agus Sarah Cullen ar an dord.
Roinnfidh an scaifte thar barr sin an stáitse ag Barr a’ Tí le Nodlaig Ní Bhrollaigh chomh maith. Amhránaí a tógadh in oidhreacht an cheoil thraidisiúnta i nDún Geimhin í Nodlaig agus ba cheoltóirí clúiteacha iad a tuismitheoirí Anne agus Francie.
Mar gheall ar a hoiliúint chlasaiceach, chuaigh Nodlaig ar camchuairt ar fud an domhain le sárcheoltóirí eile amhail Phil Coulter agus an San Diego Symphony Orchestra. Beidh rianta óna dara halbam Cuimhní Rúnda le cloisteáil in éineacht le hamhránaithe eile ó iarthuaisceart na tíre: Máirtín Ó Catháin (fidil), Pól Mac Giolla Easpaig (na píoba/dordveidhil) Affraic Brophy (fidil) agus Carra Nic an Bhaird (cruit).
Pléann Cuimhní Rúnda leis na tréimhsí agus na háiteanna i saol Nodlaig a spreag a cuid ceoil le 20 bliain anuas. Roghnaíodh an ceirnín mar ‘Albam na Seachtaine’ ar RTÉ Lyric FM.
Is mar chuid de Scoil Samhraidh Mhic Reachtain a bheidh an oíche seo ar siúl. Dianchúrsa seachtaine é an Scoil Samhraidh mheallann cúpla céad foghlaimeoir go Bóthar Aontroma i dtuaisceart na cathrach gach bliain. Teagasctar scileanna gramadaí idir bhabhtaí tae is caife sa Chaifé Ceoil. Anuas air sin, buaileann grúpaí ceoil cúpla fonn sna dorchlaí agus féadann foghlaimeoirí pléisiúr a bhaint as blasanna an domhain le haonach bia idirnáisiúnta ag Barr a’ Tí.
Beidh Scoil Samhraidh Mhic Reachtain ar siúl ón 20 Meitheamh go dtí an 2 Lúnasa agus tá ‘Ceol sa Dúchas’ le titim amach Dé hAoine an 25 Meitheamh.
