Tá ceoltóir óg Gaeltachta ar chlúdach ceann de na seinnliostaí Spotify is mó éisteacht in Éirinn an tseachtain seo. Eve Belle, ceoltóir 20 bliain d’aois as Gaoth Dobhair i nGaeltacht Thír Chonaill, atá sa bpictiúr clúdaigh ar an seinnliosta A Breath of Fresh Éire ar an tseirbhís sruthaithe ceoil an tseachtain seo.
Tá os cionn 33,000 míle leantóir ag an seinnliosta Éireannach, a chuireann ceol nua ó cheoltóirí na hÉireann chun cinn ar an ardán, agus tá amhrán nua Eve — ‘First Impression Feat. Tebi Rex’ — sa dara háit ar an liosta sin an tseachtain seo. Tá amhrán eile dá cuid — ‘Best Intentions’ — níos faide síos an liosta chomh maith.
Tá 75 amhrán nua Éireannach ar liosta na seachtaine, an t-amhrán agóide ‘Nina Cried Power’ leis an amhránaí mór le rá Hozier ina measc, chomh maith le ceol ó Gavin James, All Tvvins, Villagers agus Le Galaxie, ach ba í bean Ghaoth Dobhair a roghnaíodh le bheith mar phictiúr clúdaigh an tseinnliosta an tseachtain seo.
Rugadh Eve i mBaile Átha Cliath ach tógadh i nGaoth Dobhair í. Bhuaigh sí Gradam NÓS sa mbliain 2016 sa rannóg ‘Amhrán na Bliana’ dá hamhrán Gaeilge ‘Solas’. Tá roinnt amhrán eile Gaeilge eisithe aici ó shin agus is minic a chasann sí ag ócáidí Gaelacha ar fud na hÉireann.
